夜蒲新型态：黯夜look要咁着！

　　广州夜经济咁旺，夜晚梗係要多啲出去吃喝玩乐啦！夜蒲可以有咩look？开播以嚟话题度一直高企嘅港剧《黯夜守护者》,虽然主要讲述一连串案件的侦破，但并唔妨碍我哋暗中观察到夜蒲型look新花臣。男女主负责破案，我哋一起穿起“黯夜look”，夜蒲要有新“型”态！

　　郭玮/文  《黯夜守护者》海报、剧照/图

 　　

　　校服look： 隐藏年龄有计仔

　　学生哥主场喺校园，所以校服look绝对会係佢哋嘅最经典形象啦。学生装一定要有衬衫打底，V领冷外套衬面，男仔就搭西裤，女仔穿翻百褶裙就最青春。双肩包、斜跨袋都好啱校园风，最紧要係发型清爽整齐，老师见到就会俾个good你。去到夜晚，校服look打扮一样好减龄，如果想再relax一啲，换上全黑装扮就实唔会出错，放低平时扎起嘅马尾，摆个chok样行街，冇人睇得出你年纪！

 

 

　　“古惑”look： “痞子”样够chock

　　剧中嘅“高辉”曾经为咗查案化身卧底，结识咗唔少“江湖中人”，呢啲人其实喺后面嘅案件中，都帮咗佢好多。“重新做人”变翻警察嘅高辉，时刻记住自己警恶惩奸职责嘅同时，亦都冇忘记讲义气嘅江湖兄弟，所以一身“痞子”气估计都好难撇甩，不修边幅留须，纯色卫衣搭外套就係佢嘅饮衫。呢一身经典“古惑look”，睇起嚟随便但又唔失气场，个样唔够chok就唔容易俾人虾啦。

 

 　　

　　御姐look： 有褛有气场

　　入秋了，早晚都会比较凉，女仔夜蒲着翻件褛，保暖又可以增加自己的嘅气场。想显气质，可以好似陈敏之咁穿长款过膝毛呢外套，深色较稳重，彩色显年轻，豹纹图案增加气场。如果工作好似madam咁，成日要冲锋陷阵，短款工装褛就好啱使，干练有品位，充满行动力。姐姐睇落好强悍，但其实内心都有希望被人保护嘅柔软一面，一件大褛仲係女仔嘅“保护饰”。

 

 

 　　

　　野性look： 颜色够张扬

　　想好似KOL咁令人瞩目，服饰一定要够张扬！闪片内搭，加高饱和度连衣裙，亮眼卫衣等等造型最煞食，再增加一啲镂空、露肩等等小细节，成个朋友圈最磢镜嘅就一定係你。剧中个性张扬嘅“卢小宝”就同大家做个示范，佢性格比较野，中意周围焫火头，齐刘海造型帮佢减龄，穿起短裙、紧身衫，好身材依然挡不住，自然会成为场中焦点。

 

 

 

 

　　“阿头”look： 铁汉有柔情

　　剧中嘅“威哥”经常将“我做嘅係正行生意”挂喺嘴边，从良后嘅“大哥”都有自己善良嘅一面，其中囡囡更加係佢嘅软肋，本性善良嘅大哥，都会有真情流露嘅时候。做“阿头”就一定要镇得住个场，油头、眼镜、西装外套係标配，睇起身就係斯斯文文嘅生意人，将深不可测嘅心思都隐藏起来。