学“新”词，做新扎粤语达人

　　粤语词汇好盏鬼，就算几“新”的词，都可以有你意想唔到嘅讲法，新鲜唔够劲，一定要加埋“滚热辣”，听到你上头！“新扎”唔一定係警察，仲有机会“晋升”。过完年都仲係“新正头”，感觉新年都被“延长”了。今期Color带你学“新”词、涨知识，齐齐为生活添新意！

　　陈祉伶/文、图  郭玮、黄芷晴/模特

 

　　

　　新地 sen1 déi6

　　暑热天气，好多人都钟意食雪糕，而一些店家会将雪糕写成“新地”，你又知唔知点解呢？其实唔係所有雪糕都叫新地，佢係英文“Sundae”音译过来嘅，特指在顶部加有压碎的果肉、果汁或坚果等的冰淇淋，普通话一般译作“圣代”。由于地理位置和历史原因，广东在与外国长期的接触中，粤语也吸收咗唔少外来词，好似“新地”呢啲音译词在长期使用过程中逐渐融入粤语，已成为粤语词汇嘅一部分啦，类似词汇仲有巴士（bus）、士多（store）等。

　　造句：街口间快餐店新出咗芫荽味新地啵，我哋等阵一起去试下啦。

 

　　

 　　   新扎 sen1 zad3

　　“新扎”呢个词原来常用于警察行业，“扎”係绑、佩戴的意思，警察的器械，比如配枪、警棍之类一般都係“扎”在腰上，因此“新扎”意为啱啱带上枪，即表示初初做上警察。如今也常常把它用到其他领域，多形容啱啱进入某一行的新手。另外，由于“扎”在使用过程中，也被赋予咗“升职、受任命”的意思，所以有时也会用“新扎”去表示某人最近升职上位或者崭露头角。

　　造句：TVB台最近咁捧陈滢，睇嚟今年嘅新扎“视后”分分钟就係佢了。

 

　　

　　新正头 sen1 zing1 teo4-2

　　该词源于“新正”一词，早见于唐代，例见：唐·白居易《岁假内命酒赠周判官萧协律》：“共知欲老流年急，且喜新正假日频。”“新正头”其实係取新年正月好开头之意，整个农历一月期间都会被叫“新正头”或者“新年头”。“新正头”係一种非常口语化的表述，时至今日，仍然有不少广州人使用这种表述，需要注意嘅係，在读这个词嘅时候，“新正头”的“正”字同“头”字都要变调。

　　造句：新正头记得要讲多啲吉利嘅话，咁先多人锡噶。

 

　　

　　新鲜滚热辣 sen1 xin1 guen2 yid6 lad6

　　“新鲜滚热辣”呢个词本身係用嚟形容啱做好嘅菜肴，热辣滚烫，如今也借以形容新鲜的东西或刚发生的事情。“辣”喺呢个词中并非指辣味，而係取滚烫之意，所以广东人同你讲“好辣”嘅时候，好可能係“好烫”的意思。其实形容热、烫嘅粤语正字应该“焫（读nad3）”，不过因为大家日常生活中讲懒音讲得多，好多时就贪方便用“辣”代替咗“焫”。喺一啲特定词中，辣亦有咗热、烫嘅意思，比如“热辣辣”。

　　造句：蛋挞梗係啱啱出炉最好食啦，新鲜滚热辣啊嘛！

 

　　新净 sen1 zéng6

　　想表示一样嘢係初始状态、未俾使用过，斋一个“新”字，喺粤语入面表达就未够精准，我哋通常会按语境需要选择唔同嘅形容词，例如想要表示新给嘅程度好高，就会用到“新簇簇”，不过呢个词多用于服装穿戴嘅新。而“新净”就更加常用，当大家用“新净”形容某一物品的时候，除咗指表述物件崭新以外，还暗含洁净嘅意思。

　　造句：我部相机买番嚟之后日日都会保养噶，依家仲新净过商店摆住嗰啲。