胡鸿钧唱歌 support原创音乐

　　“Color班马”直播间（可乐生活融媒体直播间）又有贵客到！自从我哋开设咗个醒目又靓仔嘅直播间之后，越来越多艺人Friend中意嚟探访打卡，同我哋嘅粉丝互动玩游戏。今次係我哋嘅超级老友Hubert仔胡鸿钧，嚟参与“我为原创歌曲打call，busking PK赛”活动，唔单止开live晒靓声，仲分享咗自己嘅创作心得，为有原创音乐梦嘅朋友仔打气。

　　郭玮/文 秦丽莹、经纪公司/图

 

　　支持原创，支持自己

　　Hubert多才多艺就大家都知噶啦，佢对音乐创作有自己嘅一套。但大家唔知道，原来佢嘅创作灵感都几“随机”，揸揸下车、冲冲下凉都会有feel，呢个时候要即刻记低个旋律；有时真係搵唔到感觉，佢就会逼自己，坐喺唔同嘅乐器前面攞灵感，唔知大家听佢嘅歌仔又听唔听得出呢？今次，Hubert参与到“我为原创歌曲打call“2023 Busking PK赛呢个活动中，係因为佢期待可以见到更多热爱创作嘅朋友，所以鼓励大家勇敢show出自己嘅才华，佢亦会同Color一齐support大家。最近，Hubert都推出咗自己创作嘅首支国语单曲《Give Me A Chance》，正正係有歌迷朋友嘅一直鼓励，令佢更加有信心，坚持打造出呢首新歌，佢希望以此嚟感谢大家对佢嘅爱与应援。有原创音乐梦嘅朋友仔，真系可以向Hubert取下经。

 

 

 

 

　　代入角色，更多灵感

　　喺今次嘅busking直播中，Hubert为Color嘅粉丝送上多首靓声作品。其中，佢最想同大家分享嘅係《凡人不懂爱》，呢首歌係《降魔的2.0》嘅片尾曲，当时受电视剧监制邀请演唱嘅时候，佢就自荐要自己创作片尾曲，最终结合自己喺剧中饰演“豪仔”嘅感受，创作出呢首歌。对于Hubert嚟讲，简单率真的“石敢当”，係比较贴近佢本人性格嘅角色；而“豪仔”嘅性格相对复杂，令佢创作嘅时候会谂得更多。同样係《降魔的》系列OST嘅《到此一游》，就係令到好多人认识Hubert嘅一首作品，亦被佢视为自己音乐路上里程碑式嘅作品。最近，佢忙于自己嘅巡演，摆喺音乐创作上嘅时间就相对少咗，等巡回音乐会结束之后，佢就会放更多心机喺音乐上，大家可以期待一下。

 

 

 

　　“完美篇”，係新开始

　　“The Day到此·开始”巡回音乐会，从广州开始至广州结束，Hubert话就好似画上一个完美嘅句号咁。最令佢感动嘅係，歌迷会排除万难去现场撑佢；最惊喜係收到粉丝送嘅手作礼物，最难忘係每一次大家都会记得叫佢“除衫”……呢次係佢出道十年，首次喺内地举行巡演，Hubert喺现场都有新消息话大家知，原来佢加盟咗新嘅唱片公司，未来会送俾大家更多好嘅作品。佢想借今次《可乐生活》嘅采访，多谢冧佢嘅所有人！而且，特别多谢Color团队一直以来对佢嘅支持，有新嘅动态会第一时间话俾Color知，希望未来继续同我哋玩更多得意嘢。中意Hubert、撑原创音乐嘅朋友仔，记得继续关注我哋啦！