同刘浩龙撑枱脚

　　作为行走的广州吃喝玩乐指南，Color君会经常带艺人Friend周围去玩，一尽地主之谊嘎。上次“师兄”刘浩龙嚟到广州，我哋就另辟蹊径，带佢去海珠区饮饮食食。大家可能唔知道，海珠区都有好多美食故事噶：3蚊均一嘅“糖水铺”，广州最好食嘅煎饺，咖啡都可以有“陈年旧事”……快啲跟住Color君同“师兄”去date。

　　郭玮/文   叶思玲/图

 

　　3蚊糖水有惊喜

　　Color君同“师兄”嘅约会，由甜甜蜜蜜嘅糖水开启。呢间藏身喺海珠基立北街巷子里的“糖水铺”，已经有20几年历史噶啦，呢度每碗糖水仅售3蚊，真係大件夹抵食，炎炎夏日食翻一碗，消暑又解渴。“师兄”话虽然自己好少食甜嘢，但眼前嘅糖水令佢谂起自己的家人，比如有妈咪钟意的绿豆糖水，婆婆钟意的番薯糖水。店里仲有绿豆海带、椰汁西米、姜汁豆花等品种多多，每一款都係广州人由细食到大嘅回忆。“师兄”仲话喺自己童年印象中，龟苓膏係好苦的，但见到老板将浓稠的炼奶，淋上龟苓膏面的时候，瞬间又勾起佢嘅食欲——原来“师兄”细个嘅时候好钟意炼奶噶，“一定会食到吮手指！”龟苓膏的甘苦同炼奶的甜腻互相中和，清凉柔滑的口感令“师兄”感到好有惊喜。

 

 

 

 

　　传统口味食唔厌

　　Color君发现“师兄”好钟意食煎饺，就同“师兄”去咗“广州煎饺排行榜”中霸屏高位的煎饺店打卡。呢度最煞食嘅冰花煎饺，皮薄馅多味道正，一啖一粒嘅size最得人钟意，淀粉勾芡煎成薄脆香口嘅冰花底。生煎云吞係店内另一款人气美食，虾肉馅新鲜爽口，生煎云吞冇炸云吞咁干硬，柔软之中又带啲焦脆，口感好正。“师兄”食煎饺要蘸陈醋，食煎云吞就落大红浙醋，从酱料上嘅执着，可以睇出佢同Color君一样、对吃认真。到咗午饭时间，我哋来到南石头纸厂旧址，呢度从1986年开始变成“池记”大排档，红葱头白切鸡、惹味五杯鹅、鸡杂炒芥兰……出品有保证嘅传统粤菜，承载咗好多旧街坊的回忆。食酿油炸鬼、酿腐皮呢啲煎炸嘢，我哋依家都习惯配酸甜酱，而“师兄”就话：“酸酸甜甜係细路仔嘅口味，有机会一定要试下喼汁啊！”原来，喼汁先係最传统嘅配搭。

 

 

 

 

 

 

　　特色咖啡好warm

　　下午茶时间，点可以唔饮杯咖啡？我哋拣咗一间好温馨嘅café歇脚。呢家充满恐龙元素嘅咖啡店里面，有两款好特别嘅咖啡：酸奶dirty同“陈年旧事”。酸奶dirty将浓稠的酸奶同甘醇咖啡两者混合，饮落丝滑浓香，清新又解腻，真係好有满足感；陈皮咖啡加入陈皮同桔子糖，啡香同陈皮香竟然意外和谐，桔子糖甜而不腻，加上茉莉花茶点缀，令“师兄”对呢款“陈年旧事”赞不绝口。从店名到店内装修布置，都用咗恐龙的元素，係因为老板阿sa嘅囡囡钟意恐龙，阿Sa就希望用呢嘅元素鼓励大家要有成长的勇气同力量，真係又warm又sweet。