精彩有take2

　　精彩嘅电视剧，往往令人难忘，仲会忍唔住返煲。《逆天奇案》当年嘅结局，係“森sir”同“wing姐”分手收场；《家族荣耀》中“甄芯”被人刺死；《痞子殿下》有情人终成眷属仲生埋BB，下一代会唔会有更多故事？最近呢3部电视剧都开启“take 2”模式，除咗延续剧情外，仲有原班人马齐齐回归，令人期待值拉满！

　　

　　郭玮/文 官方海报、剧照/图

 

　　

　　情事逆天

　　

　　仲记得喺《逆天奇案》中，因为冯盈盈扮演的Ana插足，林夏薇与陈展鹏饰演的角色最后分咗手，令唔少观众好遗憾。而呢份唔完美嘅感情亦将延续到《逆天奇案2》中，贯穿全剧嘅除咗牵引剧情嘅一单单悬案外，更有睇头嘅应该係剧中的感情线：两位分咗手嘅主角会启动“箍煲模式”，据闻今次会有方力申饰演嘅新角色，介入佢哋之间嘅感情，令到呢条感情线再生波折。刘佩玥同张颖康呢pair衰人夫妇搭档会再回归，喺上一季剧情中阿Moom已经game over，所以佢今次会以新角色回归。冯盈盈有咗新拍档，时隔26年再拍TVB剧集嘅梁小冰，都同老公陈嘉辉组成CP……《逆天奇案2》嘅情事睇落比第一部仲“逆天”。而作为礼尚往来，马国明将会以《法言人》嘅角色喺剧中客串，会係该剧嘅又一个看点。

 

 

 

 

　　内斗激烈

　　

　　《家族荣耀》描述嘅家族内斗戏，越狗血越係俘虏街坊心，监制随即开启第二季嘅“家族内讧”，不过故事就由“马家”迁移到“丘家”。剧名《家族荣耀之继承者》，顾名思义会係一场大家族继承人之间嘅斗争，重男轻女嘅豪门，却喺关键时候将家族生意交到长孙女手上，係阴差阳错定係另有计谋？第二季嘅“家族”成员基本沿用第一季嘅班底，观众期待值最高嘅男女主角就由杨茜尧、张智霖换成咗佘诗曼同林峯，“加载咗”大家对《使徒行者》中“爆钉CP”嘅关注。加上仲有许绍雄、罗嘉良、余安安等老戏骨嘅加入，陈滢、王敏奕等话题靓女客串，剧中家族内斗、商战都会更加精彩，所以就算主角换人，都冇影响到大家对剧集的关注度。

 

 

 

 

 

 

　　戏中有戏

　　

　　《痞子无间道》冇延续上一部的剧情，不过就延续咗之前嘅无厘头与搞笑嘅风格，戏中有戏嘅情节会有各种反转，乱入嘅广告位竟然好好睇，令大家佩服编剧嘅才华。今次，故事背景由“首振镇”搬咗去“殿示城”，原本大家以为呢个地方会鱼龙混杂，殊不知却係一派安居乐业嘅景象。周嘉洛今次饰演一名捕快，喺同王灏儿追查细作嘅过程中，结识到戏班首领陈滢同张颖康，发现原来“殿示城”中嘅一切都係戏……周嘉洛搭陈滢、朱敏瀚搭JW嘅组合，令人觉得熟悉又期待。早前四人仲搭档出埠旅行，相当欢乐，再次合作佢哋一定係感情升温、默契加倍，相信喺万千星辉颁奖礼揽下“最佳电视拍档”奖嘅佢哋，都唔係浪得虚名嘅。