潮搭新look有公式

　　

　　广州在不知不觉间进入“乱穿衫”季节，卫衣衬人字拖、冷衫配短裤、短裙搭西装……只要你敢，就可以混住穿！今期Color帮大家搜集到几种混搭公式，保证令你有风度又有温度，出得户外，入得办公室，轻松成为最识搭配嘅潮人！

　　

　　饶禧/文  Alan、UR官网/图

　　

　　

 

 　　  长短拍硬档

　　

　　广州嘅天气忽冷忽热好魔幻，我哋就用魔法嚟打败魔法！T恤确实超百搭，斋着一件短袖似乎又dry咗，仲觉得稍微差咗啲温度添。叠加长袖打底，唔单止带出造型嘅层次感，起风嘅时候仲凉而不冻啱啱好。黑白基础色做底，可以突出彩色短袖，如果反转搭配，鲜艳嘅打底衫就会成为你造型嘅最大亮点啦。除咗长短T叠穿，冷背心搭配唔同长短嘅内搭，都可以有唔一样嘅感觉。同色系长袖令造型简约干净，搭短袖就清爽轻松。大家可以根据自己嘅体感接受，下身搭配有设计感嘅渐变色长裤，或者宽松简单嘅短裤都ok，长长短短互补互助，混出最适合广州潮人嘅穿搭！

　　

　　

 

 　　LVxSupreme秋冬时装秀

 　　UR男装开襟衬衫+宽松抽绳短裤

 

 　　Manufacture短裤

 　　  工装不low法

　　

　　多袋工装马甲搭唔好就似钓鱼look，冲锋衣唔小心仲会穿成外卖哥添，用啲撞色单品或者同色配件去混搭，可以提升佢哋嘅时尚感，就唔惊工业风显low啦。工装马甲可以选有拼接属性的款色，重磅厚实啲嘅面料更能修饰肩部线条，里面搭配纯色卫衣就点都唔会出错，最后戴翻顶暗色渔夫帽，即刻街头酷boy嘅感觉出晒嚟。白色冲锋衣可以试下同撞色短裤衬，一秒变身近排好hit嘅“山系男孩”，无论户外放飞or上落班通勤，都有挡风又透气双重优势，再花啲心思照顾埋鞋袜等小细节，最潮工业style就get到晒。咪以为工装係boy style only啊，女仔用风衣搭工装裙，运动得嚟仲有俏皮感，怕凉嘅可以衬翻对长筒袜仔，拉长腿部线条，工装索腿全部get。

　　

 　　黑色无袖马甲

 　　UR男装口袋衬衫

 

 　　Crying Center冲锋外套

 

 　　男装立体口袋马甲外套

 

　　老西新主意

　　

　　西装向来走斯文老派路线，但好多后生仔惊自己唔够绅士hold唔住。Oversized嘅西装可以运用“三文治模版”嚟搭配，打底同西装同色，中间用“无彩色系”做过渡，有层次得嚟唔会太花咈；如果想活力啲，沉色老西就要搭亮眼少少嘅衬衫，有啲条纹图案都几唔错噶。冇人规定西装一定要衬西裤嘅，试下衬翻同内搭一样色系嘅工装裤，成个造型即时醒神晒啰；穿牛仔裤就更加休闲，老爹鞋、板鞋随意搭，拍拖开趴会兄弟，咩场合都啱key。老味西装撞一撞，即刻新鲜感满泻。

 

 

 　　男装高领T

 　　男装撞色长袖衬衫

 　　男装印花西装外套

 　　男装条纹衬衫