黄妍：面对困难，驯服困难

　　

　　最初认识Cath黄妍，係听佢嗰啲“控诉”落雨，“投诉”疼痛的作品。可乐君以为佢会好酷、好内向，甚至有啲担心点样先可以同佢打开话题。冇谂到，佢嚟到嘻嘻哈哈嘅Color厨房显得好放松，好奇、鬼马、冇包袱，好快就同我哋玩埋一堆。

　　

　　郭玮/文  受访者提供、秦丽莹/图

　　

　　

 

　　作品留“一扇窗”

　　

　　《广州有雨》係Cath最近推出嘅一首单曲，歌词里面唱嘅係流连在雨中的沙面老街，令人回忆起过去嘅事情。因为机缘巧合听到呢首歌嘅demo时，Cath话：“我好中意落雨噶，好有氛围感。”当讲到佢啲作品都比较emo，Cath即刻澄清，自己一定会为作品留翻一扇“窗”，尽管歌词唱尽悲伤的故事，但肯定会有积极嘅元素喺里面，好似《我心中尚未崩坏的部分》就会唱到“我就算全身有伤，心至少一寸未变坏”，又好似《世界以痛吻我而我歌唱》中“若有伤，能豢养”“没有奖，能颂唱”，Cath曾经将自己比喻成“行出废墟的女孩”，既然行得出废墟，心中就会有尚未崩坏的部分。

　　

　　

 

 

 

 

 

 

　　成长有“小确幸”

　　

　　在成长过程中，Cath觉得自己几幸运。Cath自细就好中意唱歌，但屋企人就希望佢认真考虑，兴趣係咪可以成为职业。后来佢被唱片公司发掘，成为歌手出唱片、开show，令Cath觉得，人生有好多种可能，趁后生应该勇敢啲去尝试。Cath养咗一只吉娃娃，细细只但脾气好大，Cath话以前唔知应该点同佢相处，经常会被佢咬，但时间耐咗、互相了解对方，佢开始feel到狗狗嘅可爱，而狗狗亦会陪佢一起开声练歌，有爱宠陪伴嘅日子特别治愈。Cath中意睇电影、睇小说，前排中秋假期，佢就约埋啲歌迷一起，跟住小说中提及嘅地点打卡游玩。歌迷觉得面圆圆嘅Cath係“月亮小姐”，佢仲自嘲赏月嘅时候会见到两个月亮添。

　　

　　

 

 

 

　　同困难“做friend”

　　

　　Cath同味道好有缘分。佢曾经试过唔跟食谱、自创白汁煮法，煮出嘅黑暗料理，吃到令人生无可恋；为咗帮佢调理身体，妈咪特意用黑糖调配养生鸡酒，成为佢时时回味嘅暖心滋味；而一杯偏酸嘅手冲咖啡，可以帮到佢神清气爽咁创作……啱嚟到Color厨房，Cath话先话自己冇办法驯服面粉，但同可乐君倾倾下计，佢就同手中嘅面团friend咗，越整越顺手。中意落雨嘅Cath坦言，自己曾经好怕水，但当自己去面对佢、接触佢嘅时候，就发现其实水都冇想象中咁得人惊。为此，Cath今次特意用“水”做主题开show，希望同大家讲，面对困难、克服困难，比惧怕逃避更有用！