同“爆炸头”一起“瞓”斗

　　

　　最近Mike曾比特参加咗一档综艺——《我要瞓斗》，参赛者需坚持60个钟头唔瞓觉，期间仲要以饱满嘅状态去完成各种任务。“爆炸头”Mike坦言自己平时劲中意瞓觉，好彩作为节目MC嘅佢係可以轮流休息嘅。今次佢整理咗一啲关于瞓觉嘅粤语词汇，要带大家一齐“瞓”斗啦！

　　

　　郭玮/文  秦丽莹/图

　　曾比特、郭玮/模特

　　

 

　　早唞 zou2 teo2

　　

　　粤语里面的“唞”，係休息嘅意思，佢嘅正字应为“敨”，意思係将包住或者卷住嘅嘢打开，引申出休息时将身体舒展开、躺平嘅意思。早唞就解作早啲休息、晚安嘅意思，一般用喺晚上同亲人、友人分别时，用作传递祝福，或者係晚上瞓觉之前所说的礼貌及温馨用语。

　　造句：阿Mike同你讲完早唞，转身就匿入被窦玩手机啦！

　　

　　

 

　　眼瞓 ngan5 fan3

　　

　　“瞓”其实係广东人自创嘅一个字嚟嘅，佢嘅俗字为睏，意思为疲倦因而想睡觉。作为广府方言，“瞓”字有躺下、睡觉嘅动态意思。眼瞓可以解释为眼睛感到疲倦，躺下休息的意思。大家经常讲嘅“瞌眼瞓”，情景意义则是困倦时小睡一阵，类似于北方口语中的“打盹”。

　　造句：连续加班咗几日，难怪阿斌同阿轩两个开会都瞌眼瞓啦！

　　

　　

 

 　　   戙起床板 dung6 hei2 cong4 baan2

　　

　　“戙”有立起、竖起、支撑、抬高之意。旧时候的床架大多铺着一张木床板，将床板竖起或者支起，就无法正常瞓觉，因此戙起床板比喻连夜工作、学习或者思考问题，整晚不瞓觉。这个词又可以写作戙高床板。

　　造句：就快期末考了，唔少同学戙起床板疯狂温书，希望攞个好成绩。

　　

　　

 

 　　   捱更抵夜 ngai4 gang1 dei2 ye6

　　

　　“捱”係艰难度过嘅意思，而“更”喺呢度就指夜晚的时间，旧时候一夜会分五更，“抵”有持之以恒的意思，喺呢个词中延伸为熬夜。捱更抵夜指彻夜不眠、日以继夜咁辛勤工作，而“捱眼瞓”係犯困但仍挣扎着不去瞓觉的意思。

　　造句：人哋捱更抵夜係为咗赚多啲，你两个捱眼瞓就係为咗玩游戏。

　　

　　

 

　　

　　

　　瞓捩颈 fan3 lit6 geng2

　　

　　“捩”的本意是扭转，引申义是违逆、不顺，亦有拗折、折断的意思，瞓捩颈係颈部肌肉急性挛缩而引起疼痛嘅现象，通常为瞓觉时扭转了颈筋，颈部肌肉拉伤疼痛，即落枕、睡歪脖子。会瞓捩颈多数係因为睡眠姿势不良，或枕头不符合颈椎生理弧度所致，如果经常发生咁嘅状况，就要好好自查一下啦。

　　造句：阿豪话今朝瞓捩颈，实係佢寻晚瞓喺床度玩手机，唔小心整亲啦。

 

　　  扯鼻寒 ce2 bei6 hon4

　　

　　“扯”指拉长、抻长，“鼻寒”即“鼻鼾”，係打鼾、打呼噜嘅意思。扯鼻寒就指啲人瞓觉时打呼噜，声音拖到好长，延绵不断咁，一般係瞓觉时气管受到压迫，而气体冲击咽部粘膜产生声音嘅现象。扯鼻寒又可以写做打鼻寒。

　　造句：德仔坚决唔同辉哥一间房，因为佢嫌辉哥瞓觉成晚扯鼻寒，好难瞓嗰靓觉。