刘佩玥：将“自己”融入角色

　　

　　“大马视后”Moon刘佩玥趁住空档期嚟广州city walk，而可乐生活融媒体直播间作为大湾区新晋“潮点”，一早就被Moon列入今次行程嘅打卡list啦。最近广州秋意渐浓，可乐君特意将Color手作坊set一个可爱嘅主题，同Moon玩下毛绒绒又warm嘅冷线戳戳绣，一边“刺绣”，一边倾心事。

　　

　　郭玮/文  受访者提供、秦丽莹/图

　　

 

　　 融入角色“你中有我”

　　

　　《逆天奇案2》啱啱结束拍摄，Moon透露话，自己会以一个全新嘅人物形象，再次喺呢部剧中同大家见面。电视剧就好似一个“美丽战场”咁，每个演员都会喺里面尽show自己，不论係先前《逆天奇案》入面坏坏嘅“尤丽”，定係《四个女仔三个bar》中善良单纯嘅“Holly”，抑或係《降魔的》里面甜到漏嘅“啤啤”，Moon都表示好难拣出一个最似自己嘅角色，反而係佢喺诠释每个人物特性嘅时候，会加入一啲自己嘅感觉入去，令到角色同佢嘅形象更贴合。样靓声甜嘅Moon中意挑战反派角色，首先因为喺现实中，自己唔会有咁曳曳嘅时候，其次佢觉得可恨之人必有可怜之处，如果能够用自己嘅理解诠释这些人和故事，佢会觉得好有成就感。

　　

　　

 

 

 

 

　　与自己对话劲减压

　　

　　今年係Moon入行嘅第10年，这么多年经历的人和事，积累到嘅经验，都对佢意义非凡。回忆起当初参选港姐，佢係被当年的口号——“超越想象”所吸引，想趁住呢个机会，睇下自己有几大潜力。Moon特别提到，几年前拍摄《隐形战队》时，曾经因为失误导致多次NG，喺即将崩溃嘅时候，佢同自己讲要冷静下来，最终完成了拍摄。Moon话自己有好多面向，大家印象中佢大大咧咧、活泼开朗，但喺独处嘅时候，佢会安静地用纸笔记录当下嘅心情，好似同自己对话咁，相当减压。Moon一路成长，逐渐意识到最了解自己嘅始终係自己。

　　

　　

 

 

 

 

　　氹笑别人齐齐开心

　　

　　今次Moon同我哋玩冷线戳戳绣，绣嘅图案係佢最中意嘅布甸狗，佢玩得特别投入同开心。今次係Moon首次攞起“绣花针”，不过对穿线、戳绣、收尾一套动作，佢好快就上手，一针一线戳出属于自己嘅作品，倾注咗满满嘅爱意。虽然已经大个女，Moon依然钟爱睇卡通片，因为呢个过程会令佢谂翻以前同屋企人一起嘅温馨时刻。其中，迪士尼嘅公主形象早已刻进佢嘅DNA，遇到朋友唔开心嘅时候，佢会模仿卡通人物嘅声线氹人，朋友睇到滑稽又鬼马嘅Moon就好难再嬲了。“可以令到人哋开心，我自己都会好开心噶，哈哈哈！”Moon喺Color手作坊唔单止留低咗可爱暖心嘅手工，更俾大家带来好多甜蜜欢乐嘅回忆。