DASH：做音乐同整饭团一样

　　Mr.成员DASH近几年甚少露面，最近突然宣布，要召集同队成员举行音乐分享会。佢对摇滚嘅热忱没有减退，但时隔多年、久违舞台，就多咗一啲真诚，增添咗几分浪漫。前段时间，佢同可乐君倾咗好多关于自己、音乐同未来嘅嘢......

　　

　　郭玮/文  冼颖樱、受访者提供/图

 

　　

　　做个好爸爸

　　

　　初见DASH，长发、纹身、黑色衫，摇滚人嘅气质就已经完美体现，但佢一开口，可乐君就feel到满满嘅亲切感。DASH话，自己有好多身份，歌手、音乐人、小食店嘅老板……but佢最中意嘅，係“爸爸”呢个角色。对于自己嘅小朋友嚟讲，佢希望自己係榜样，引导佢哋往更好嘅方向成长 ；而对于其他年轻人，佢亦希望自己好似“爸爸”咁，可以将佢觉得有价值嘅经验传承落去。嚟揾可乐君之前，DASH整好咗各种馅料嘅饭团，仲有全素配料嘅款式，照顾到每一个人嘅口味，每款都新鲜惹味，落足心机，食完令人好暖、好满足。

 

 

 

 

　　演场good show

　　 

　　喺音乐比赛上，DASH 发掘到18岁嘅启正，觉得佢有天赋又够努力，于是DASH 就此成立咗曲词编监唱作协会，畀年轻人交流音乐、推广人才。DASH更邀请同样中意音乐嘅 Clark 张嘉耀加入协会，佢几年前喺澳门掀起“动物流”运动风潮，仲有一段艰难嘅抗病经历，非常励志，有满满正能量。DASH希望可以正正式式咁向大家介绍呢个协会，所以召集咗同队嘅成员Mj、Ronny、Tom举办“曲词编监唱作音乐分享会”。Mr.成员久违重聚，引发乐迷满满回忆杀。分享会现场会有新人献声，更少不了经典重现，DASH同Mr.其他成员都想话大家知，佢哋嘅摇滚故事仲未完，佢哋“森林”经得起变化。

 

 

 

 

 

 

　　开铺整饭团

　　

　　其实，开小食店係DASH太太嘅梦想，喺旧年终于实现咗。早起备料，开铺整饭团，落班煮晚饭，因为呢间小店，DASH话自己嘅生活都变得规律咗，更能协调好时间做音乐，家庭、事业、爱好都balance到了。佢觉得做音乐同整饭团其实有相似之处，有谂法都可以加入去，整出嚟再试下味，唔啱key仲可以重新调整，等到成品完美出炉，就可以share出嚟畀大家品尝啦。DASH中意同大家交流心得感受：“我冇乜条条框框，大家互相碰撞先有新体会。”所以经常有乐迷、朋友去佢铺头打卡 ，倾下音乐、食下饭团。