Cafe邂逅 冰火两重天

　　虽然已经进入9月，但广州依然处于高温状态喔！月初遇上台风，更係直逼37℃。天气咁热，係时候嚟翻杯冰凉嘅咖啡醒下神。近日可乐君发现咗两间独特主题嘅咖啡店，既可以喺“沙漠叹咖啡”，又可以喺“金鱼世界”中感受梦核幻境。快啲mark低，一次过体验“冰火两重天”的魅力啦！

　　

　　饶禧/文 黄译萱/图 饶禧/模特　

 

　　

　　天台沙漠出大片

　　

 

　　瞬间置身沙漠

　　

　　唔使出远门就可以轻松get沙漠大片？最近，开喺顺德春村工业园楼顶嘅呢间沙漠主题咖啡厅，成为唔少网红嘅热门打卡点之一。咖啡厅位于天台五楼，揸车上可以直接嚟到门口。一入门就会见到大片嘅沙漠造景，搭配形态各异嘅枯木同多肉植物。为咗还原最真实的场景，店家仲喺沙漠中摆咗个观景泳池，水波同蓝天白云相呼应，一瞬间仿佛置身大自然。一应俱全嘅户外元素，搭配沙漠区的暖黄配色，好啱大家着上长裙或者废土、机车风格嘅服装，各个角度影翻几张沙漠大片。

 

 

 

　　

　　摩旅中现灵感

　　

　　主理人啊卡，本身都係一位生活潮人嚟噶。酷爱揸机车摩旅嘅佢，喺一次大西北旅行中，行过一大片沙漠同戈壁后，突然好想饮咖啡。灵机一动下，佢先有咗沙漠场景结合咖啡嘅谂法。店名嘅desert代表沙漠，而音译嘅“淂失”寓意“人生有得必有失，失去都可以係另一个得到嘅开始”。为咗令每个设计位都可以打造出最适合出片嘅角度，啊卡耗费百万资金搭建场景，各种逼真枯木、秋千都有摆放，令拍摄更有视觉冲击感。店内的餐品选择都几丰富，有咖啡同其他饮品，以及各式各样嘅蛋糕，大家不妨嚟“沙漠”慢慢叹啦。除咗沙漠主题，啊卡之后会计划出一个关于自然环境嘅主题，大家期待下啦。

　　

 

 

 

 

　　

　　Desert淂失天台咖啡

　　地址：顺德区顺联智造汇17座

　　营业时间：周一至周日10:00—24:00

　　

　　 梦核金鱼水世界  

　　 

　　 

 

    捕捉斑斓光影

　　一踏入番禺市桥嘅呢间“水世界”咖啡店，会被眼前波光粼粼的透明鱼缸天花板所吸引。头顶的金鱼喺阳光照射下，洒下层层光影。主理人方舟话畀我哋知，每个时段嘅光影效果都会有新惊喜。早上折射出彩虹、傍晚会见到金鱼倒影悬浮喺空中……而喺金鱼池区域嘅另一边，係截然不同嘅港风风格设计。摆满黑胶同唱片嘅复古墙，可以令唔同年代的人喺度搵翻呼应时代嘅痕迹。隔篱仲搭建咗一个开放的音乐舞台，上台唱歌、玩下乐器都十分欢迎。佢希望呢度除咗可以打卡出片外，仲能畀到大家一个真正放松的环境。

 

 

 

 

　　轻松选择饮品

　　除咗店铺布置有特色，店内出品都好用心。咖啡豆係经过精心挑选嘅，嚟自我国云南嘅咖啡豆，主理人方舟喺调配几十种口味后，筛选出适宜嘅配方。店内首推嘅系列係“十二星座”咖啡，唔同嘅星座都会设定对应的味道同代表色。店内嘅饮品仲贴心配备埋卡片，令大家更了解每一杯的口感与特色；餐品选择多，大家可以enjoy到心仪嘅搭配。方舟仲同我哋透露，嚟紧店铺仲计划升级成环岛吧台，到时搭埋三楼嘅法式室内园林嘅风格，大家可以一边沉浸梦核世界，一边叹啡食蛋糕啦。

　　

 

 

 

 

　　SOSOL COFFEE日咖夜酒

　　地址：番禺区北桥路16号

　　营业时间：周一至周日08:00—次日01:00