有爱嘅地方就会有Mr.

　　8月底，Mr.成员DASH、Mj、Ronny、Tom重聚，同来自澳门嘅两位素人张嘉耀Clark、钟启正Kingsley，喺广州中央车站举行“曲词编监唱作音乐分享会-Mr.篇”。佢哋重唱Mr.乐队嘅经典作品，又share每首歌嘅创作背景，更喺现场分享近几年嘅成长，同乐迷度过咗感动又心动嘅一晚。

　　郭玮/文  主办方提供/图

 

　　

　　小传奇

　　

　　借《天下》怀念离开咗嘅挚友，唱《Mister》勾起过去嘅回忆，用《无谓再假》彻底释放佢哋嘅力量……时隔五年，Mr.四位成员重聚，佢哋觉得呢係个美丽嘅奇迹。喺“曲词编监唱作音乐分享会”现场，每一个旋律都会有跟唱嘅乐迷，每一段发自肺腑嘅感言都会收获一声“加油”，每个瞬间都能勾起一段感动嘅回忆。Mj同Tom为《小传奇》编曲时有“拗撬”嘅故事，Ronny将自己失恋嘅“痛”写入《等不了》，DASH有为爸爸而唱的歌……作品背后嘅故事，喺今次回归舞台首度公开，係佢哋送俾乐迷嘅礼物。慢歌，大家一起感动到落泪；快歌，齐齐起立摇摆打call，“摇滚”嘅手势举起就冇再放低。全新嘅舞台下，係依然熟悉嘅乐迷，虔诚地等佢哋翻嚟，确实係传奇。

 

 

 

 

　　

　　等不了

　　

　　喺DASH发起今次音乐分享会嘅时候，Mj、Ronny、Tom即刻就应承咗啦。从上次齐人合体到依家，大家都经历咗好多嘢，DASH话自己成日都会谂起，自己同其他成员同台嘅场景，所以觉得唔可以再等落去，应该快啲出嚟同乐迷见面。喺今次嘅分享会歌单里面，Tom话自己最中意《安歌》，因为呢首歌俾人嘅感觉，同佢哋依家嘅状态好似：喺大家已经攰嘅时候，再坚持发力一次。Mr.四位成员都坚持，只要乐队需要自己嘅时候，佢哋就一定会企翻出嚟，仲会坚守自己嘅位置，鼓手会玩自己嘅节奏，低音吉他手唔会争做主唱……对佢哋嚟讲夹band同埋玩音乐已经唔係一份工作，大家好清楚自己需要负责嘅嘢。喺当晚分享会嘅最后，DASH话只要係有爱嘅地方，就会有Mr.。

 

 

 

 

 

　　想太多

　　

　　今次嘅音乐分享会，亦等于曲词编监唱作协会嘅正式发布会，DASH成立呢个协会，係希望更多中意音乐嘅人，可以有个交流、学习嘅地方。副会长Clark同DASH因病结识，过去嘅佢匆匆忙忙忽略生活，依家佢学识放慢脚步enjoy音乐、享受一切；成员Kingsley年纪轻轻但好有谂法，喺前辈嘅引导下不断创作，向自己嘅目标前进。好似Mr.嘅《想太多》入面唱到“想得太多，可知我瑟缩在被窝”一样，绑手绑脚会令自己陷入迷惘，唔好谂咁多，坚持自己嘅初心，去闯去试，先有希望接近成功。“曲词编监创作音乐分享会-Mr.篇”，係佢哋首次以全新形式重现Mr.摇滚精神嘅舞台，未来嘅日子充满未知，同时亦充满希望，Mr.话要“好好记住我”。相信乐迷同Color一样，唔使想得太多，just期待佢哋下一个舞台更加精彩。