陈柏曦：坚持热爱，努力耕耘

　　

　　广东江门新会靓仔陈柏曦，因为喺《福禄寿训练学院》，以一人分饰四大天王嘅精彩舞台，俘虏咗观众的心。中意扮嘢又钟情喜剧嘅佢，从细就觉得自己属于舞台。成为歌手係因为热爱，升呢演员就係突破，一起嚟认识呢位新friend啦！

　　郭玮/文  黄译萱、受访者提供/图

　　

 

　　重细节

　　

　　喺《福禄寿训练学院》中，陈柏曦演刘德华时，台风从容、动作潇洒，演张学友时，还原佢嘅标志性兰花指，演黎明又从演唱会中抓住佢嘅神情，演郭富城时，focus佢唱情歌时嘅沙哑声线，完美演绎出四位“天王”嘅神韵，佢嘅“扮嘢”技能让评委、观众都好惊喜。柏曦五官深邃，生得英气，但佢就好谦虚咁话：“因为自己生得唔似，所以会尽量抓住被模仿者嘅细节并放大，希望引发大家嘅共鸣。”柏曦话参加这个节目从来都冇谂过要攞名次，係抱住学嘢的心，从王祖蓝前辈身上学到好多嘢，亦希望大家见到佢更多唔同嘅面向。既然大家中意，佢都好希望继续为大家传递欢乐同正能量。

 

 

 

 

　　

　　够勇敢

　　

　　在柏曦成为歌手之前，佢都打过好几份工，过普通上班族嘅生活。因为爱唱歌，柏曦接受朋友邀请，从线上“出道”。“出道”嘅过程都几频扑，工作日上班、周末去外地拍片，但因为真心热爱，所以一直坚持。柏曦觉得，一分耕耘未必有一分收获，但一直耕耘终会有收获，走走趯趯一年时间，佢瞒住屋企人放弃咗稳定收入嘅job，全身心走入娱乐圈。从《福禄寿》毕业之后 ，前段时间佢拍埋同期学员兼好友“筷子基”、梁山山一起举行音乐会。最近嘅呢段时间，佢筹备紧自己嘅全新音乐作品，大家可以期待一下哦。

　　

 

 

 

 

 

　　chill好戏

　　

　　江门人杰地灵，跑出好多名人，作为江门人嘅新生代歌手，柏曦都倍感自豪。见Color君去江门打卡，佢即刻拍心口做地胆，带我哋去当地好hit嘅创意园chill一chill。江会伍柒创意园，最近因有港星开茶档而出圈，除咗饮饮食食之外，仲有唔少得意手绘壁画可以俾大家打卡。最近在园里举办嘅“共生”展览，用旧物、废料装置成各种艺术品，相当出片。柏曦带住我哋食好嘢、睇展览，坚守“歌手”身份，成个过程仲俾足“戏”：切大块多士嘅时候，边切边唱起《将冰山劈开》；随手拎起一把吉他，起个节奏就可以进入《一人之境》；见到壁画上有“第四杯喝到热泪盈眶了”，大家都知道《到底发生过什么事》啦……同柏曦玩得尽兴，佢chill亲切调皮，同佢讲起工作，佢即刻超认真周到。能chill又超认真嘅呢个新friend，未来一定仲有好多惊喜俾大家。