近年唔少街道换新颜，将一盅两件、粤剧等广府文化定格成大幅墙画，等你“沉浸式”感受广州local嘅氛围感。准备好“食”指大动未？等我哋 “墙”烈推荐，一齐开启充满广府味嘅视觉大餐啦！

　　

　　郭玮/文、图

　　

　　

　　走“开胃”之路

　　

　　

　　

　　广州人最叻就係“食”，“饮早茶”更係搣唔甩嘅习惯。平时比较安静嘅华侨新村里面，近几年新增咗唔少“颜色”，其中就有一段画满“广府美食”嘅涂鸦墙，蟹子干蒸、腍软凤爪、多馅叉烧包等等茶楼必选点心，被卡通化地呈现在延绵嘅墙壁上，另类的“画卷”铺开一条令人流晒口水嘅“开胃”之路。位于北京路商圈嘅府学西街，短短400米嘅一条路上，有层层叠叠嘅茶楼传统蒸笼，童年回忆嘅好味鸡公榄等等，广州人嘅味蕾记忆，都被绘声绘色咁定格喺街道嘅墙壁上。最近“冰广式”嘅话题冲上热搜，嚟呢度，同老牌“铜葫芦”凉茶，嚟翻个错位合影就最应景不过啦。有啲涂鸦仲会融合街道的信箱、电线、点灯柱等等，3D还原“实物”，大家得闲不妨去认真逛逛，探寻个中趣味啦。

　　

　　

　　

　　花俏“广府味”

　　

　　

　　识饮识食嘅广州人也很注重文化传承！华侨新村内，有红线女嘅旧居，依家已经改建成红线女纪念馆啦，入面专门展出佢过去嘅起居环境，以及光荣事迹、剧照戏服等等。喺纪念馆嘅门口，就衬翻晒大主题，画上咗好多红线女过去嘅粤曲名伶造型，华丽嘅头饰，标青靓丽嘅妆容打扮，都刻画得非常精致、栩栩如生。而府学西街上嘅“广府文化”又有另外一番风味哦，泥塑、广绣等等民间手艺，夸张立体咁展现出嚟，伴以穿插间隔嘅“花”城标志，清新又渗透出文化底蕴。

　　

　　

　　

　　小动物丛林

　　

　　

　　

　　除咗可以对过去怀旧，感受满满老广情怀之余，潮流达人对新鲜事物的无限追求，喺呢度也能得到满足！缤纷彩绘嘅整栋小别墅，海豚畅游丝绸之路，仲有识摄影嘅孙悟空，配电箱变成哆啦A梦任意门……新旧cosover产出嘅创意，俾到后生仔女无限打卡嘅理由，拍低纯风景照，靓爆镜嘅桌面壁纸马上get；人景合一摆拍，配上创意文案，闪爆朋友圈就易过借火。华侨新村从2020年开始着手彩绘村内嘅墙壁、围栏等等固定设施，主题围绕呢度嘅历史、文化背景，体现国民、侨胞一家亲与人文关怀，令到呢个原本过分静谧嘅老社区，焕发出新嘅活力。呢度嘅壁画涂鸦时不时仲会有新增添，每过一段时间就去逛下，话唔定会遇见新惊喜。