策划：骆苹、曾敏妍　　

　　统筹：曾敏妍、郭玮　　

　　执行：郭玮、黄芷晴、陈祉伶、黄蕾、秦丽莹

　　年底社交战斗格指南

　　年底聚会多，公司年会、好友派对……话就话係普通聚会，其实都係社交“斗兽场”，作为对参加活动嘅礼仪，我哋要以争芳斗艳嘅“战斗格”，帮自己好好装身！Color呢次就帮大家做好plan，从穿搭技巧、美肤神器、靓款指甲、点缀饰品以及有趣伴手礼，从头到尾、360°无死角咁执到正，势要令你成为年底社交场合上嘅焦点！

　　即刻变索，全场最chic

　　年底聚会，唔一定就係ball场，现在聚会形式花款越来越多，可以係KTV趴、夜场part，亦可以係露营野餐趴，大家装身之前最紧要看准主题同场所，咪跑错方向。啱啱收官嘅电视剧《美丽战场》中，每个角色的穿搭都好有睇头，年底聚会嘅时候，我哋可以跟住佢哋扮靓set造型，即刻变索，全场最chic嘅就係你啦！

　　郭玮/文 海报、剧照/图　

　　Ball场 关键係细节亮眼

　　裙装，可以话係好多女性去ball时嘅首要选择，因为最容易俾人乖巧甜美嘅感觉，喺各种类型嘅ball场中都唔容易出错。剧中嘅“小美”就十分钟情于裙装，虽然版型都比较简约，不过重点係细节吸睛，木耳边、荷叶领、泡泡袖等有设计感嘅剪裁款式，能帮佢打造出小公主嘅既视感。颜色上，鹅黄、米白、裸色等浅色系，令本身就淑女嘅佢更温柔甜糯，喺人群中特别迷人。

　　喺非常正式嘅Ball上，优雅迷人嘅黑色礼服，係最稳阵嘅装束。剧中，“阿宝”“子珊”“唐昕”后期参加重要活动时，都会选择黑色礼服，小香风、宴会look、西装款各有特色，但最为抢眼嘅，反而係佢哋盘发下的长款耳环，唔单止可以修饰脸型，仲有增加气势嘅效果。

　　户外趴 印花T够清新

　　如今，大家越来越钟意同大自然“贴贴”，年底聚会地点都好有可能定喺户外嘎！呢个时候，浓妆艳抹、华丽服饰反而有种违和感，T恤加牛仔裤嘅悠闲look，打造出青春活力嘅感觉就好合适啦。百搭T恤绝对係必备单品，你可以参考剧中几位主角少女时期嘅打扮，简单清新嘅印花短袖T，外搭衬衫、棒球衫就更加有个性。淡淡嘅妆容，加上简单嘅直发，尽显少女嘅清爽与活力。

　　夜场趴 撞色叠穿玩心思

　　聚会唔一定喺周末，可以係“人约黄昏后”嘅夜场。唔想购置新衣，又想搭出令人耳目一新嘅造型？可以学下蒋家旻饰演嘅“反骨琪”，喺剧中性格张扬嘅佢，最中意穿颜色饱和度高嘅无袖衫，鲜橙色、宝蓝色、桃红色等等鲜艳色系，既可以吸引人目光，又可以衬得皮肤比较白。同时，佢仲加入咗撞色叠穿嘅小心思，增加咗层次感，又能转移视觉焦点，令露出嘅手臂线条不显粗壮。

　　男士篇 衬衫百变最冧女

　　“战场”上嘅女士们咁俾心机，男士都唔好执输。准备一件衬衫，就可以玩出唔同风格。想要斯斯文文嘅书生气，就用衬衫做外套，内搭净色T恤。事业有成嘅office man，梗係要有“老西”配搭先最型。花咈成熟男内搭花衬衫，坏坏哋嘅play boy，穿番牛仔褛够嗮chok。