TVB有好多经典好玩嘅节目，好似永远开心嘅《奖门人》系列节目、爆笑名场面多多嘅《残酷一叮》等，都係好多人嘅快乐回忆。仲有众多经典剧集嘅主题曲，熟悉嘅旋律也陪伴咗好多人成长……最近，TVB将呢啲经典元素大升级，融入新节目中，希望佢哋可以继续为大家带来欢乐啵。

　　郭玮/文  海报、截图/图

　　开心无敌，玩个不停

　　《奖门人》IP踏入25周年，“奖门人”曾志伟重出江湖，带领新旧“奖老”开启happy之旅。新节目《开心无敌奖门人》将各式经典嘅爆笑游戏重新呈现，艺人嘉宾也奋身投入游戏，发射无尽笑弹，为观众发放开心能量。好多大家期盼已久嘅灵魂人物也重返“战场”，林敏骢就係其中一位，佢曾经在“马拉松”游戏中，以一段“苏格兰场”超长念白留下经典名场面。最近，佢喺《上车家族》中表现出色，今次再参加“奖门人”节目，再玩经典game，依旧经常性“失控”，连曾志伟都拦唔住，引发大家笑声连连。仲有陈山聪、黄宗泽、蔡思贝等大家熟悉嘅面孔轮番现身节目，个个都係“玩得”之人，节目势必好欢乐。

　　旧歌新唱，怀念旧情

　　音乐综艺依家都兴玩情怀，自《声声不息》打出港乐情怀牌，大家对经典港乐嘅热情不断上涨。TVB即将迈向55周年，佢哋推出综艺《我们的主题曲》，邀请唔同年代嘅艺人，重新演绎经典电视剧OST。每期节目将设置不同主题，更有机会还原剧集中嘅场景，务求令观众坐上“港剧时光机”，回味曾经嘅感动。新编旋律亦赋予呢啲经典歌曲全新嘅灵魂，怀旧不守旧，创新不忘本！首期节目以“处境剧”为题，邀请“经典靓声”谭咏麟搭档“新派好声音”炎明熹，演绎经典神剧《他来自江湖》嘅主题曲《明天仍要继续》，两代声音交织出梦幻火花，重现过去、展现未来。除咗经典曲目原唱现身、重现精彩瞬间之外，部分前辈更会讲述当年情，用真情怀为节目升温。TVB更会将部分经典金曲集合，录制成55周年纪念大碟《经典·传承》，等大家可以将呢份美好永久珍藏。

　　爆笑一叮，全城震惊

　　十几年前，靠奇葩出位嘅《残酷一叮》，引发全城爆笑兼收睇热潮。节目上，素人参赛者为咗争取更多表演时间，赢取更高奖金，不惜出尽浑身解数。各种搞怪画面令人惊喜，靓声绝技不时惊艳全场，唔少宝藏选手更因为呢档节目走上演艺道路，开启全新人生。最近，全新升级改版嘅节目《全城一叮》开播，邀请咗电视城中大家熟悉嘅艺人朋友出战，向大家展示佢哋在电视框以外鲜为人知嘅特殊技能。演员林子超初登舞台，就变装皇后大跳艳舞嘅表演，技惊四座，用心程度令评委忍唔住起身拍手。今时今日，大家都推崇创意、鼓励勇于表达自己，每位有志之士都要喺难得嘅舞台上show尽自己。期待成功突围嘅选手们，继续show出自己嘅无限可能！