大家都知道，粤语中有好多趣怪得意嘅俚语，关于花嘅词就听得多啦，比如“花面猫”“花哩碌”等。平平无奇嘅“草”，原来喺粤语中都唔简单噶。今期粤语课堂，就邀请到Color嘅好朋友朱主爱，等“小草”本草同大家一起认识粤语中“草”嘅真面目啦。

　　陈祉伶/文、图  朱主爱、郭玮/模特

 　　  着草

　　zêg3 cou2　　

　　“着草”呢个词其实都唔难理解噶，呢度嘅“着”指穿戴，而“草”则係指草鞋、蓑衣。因为草蓑能遮挡风雨兼帮助隐蔽，草鞋就能防滑、防声，所以，旧时嘅人在野外就习惯着草鞋同蓑衣，以便奔走。久而久之，大家就用“着草”一词形容某啲人为避风头而潜逃。想“着草”嘅人，通常都係做咗坏事，心虚唔敢见人，可见呢个词係带有贬义嘅，大家平时唔好乱用啊。

　　造句：边有人着草着得咁开心，一睇就知道呢出戏係出搞笑片啦！

　　掹草

　　meng1 cou2　　

　　讲到男女之间嘅情情爱爱，粤语中真係有好多生鬼嘅“暗号”噶。好似用“十月芥菜”形容情窦初开、用“拉埋天窗”指代结婚……今日要讲嘅“掹草”，字面义係拔草，用在恋爱语境中，其实係指情侣到公园或郊野幽会。旧时，情侣拍拖最常去公园，见到意中人紧张到只手唔知放边好，咪就地取材掹下身边啲草，掩饰尴尬咯。“掹草”呢个词相当有画面感嘅，如今情侣拍拖有好多节目，公园、郊外都只是众多约会场所中嘅一个，所以“掹草”呢个词都越来越少用啦。

　　造句：你今日扮到鬼火咁靓，又咁早落班，係咪谂住去掹草啊？

　　墙头草

　　cêng4 teo4 cou2　　

　　我哋平日经常见到嘅墙头草，一般係啲生态适应性极强嘅草本植物，可以喺好多环境恶劣嘅地方生长。虽然能在墙缝中生根发芽，不过始终根基浅，无风嗰阵仲可以亭亭玉立，但遇上大风吹，风吹向哪边，墙头草自然就会摆向哪边。所以，大家就会用“墙头草”，形容一个人冇主见，又或者善于见风使舵，睇住时势嚟改变立场。

　　造句：佢份人一向係墙头草噉，边个得势佢就同边个做friend。

　　算死草　　

　　xun3 séi2 cou2　　

　　“算死草”係个地道嘅粤语俚语，顾名思义，把野草都能算死，形容一个人吝啬又凡事斤斤计较，掐算到极致，係个贬义词。比起“铁公鸡”“孤寒鬼”，呢个词仲多一层意思，指人工于心计、精于计算。而好多人提到“算死草”时，都会谂起周星驰主演嘅嗰部同名电影。作为一部地道嘅港产片，《算死草》虽然剧情比较无厘头，但台词中有许多生鬼嘅粤语词汇，都算係知识点满满嘅电影。

　　造句：几毫纸都话要平摊？咁样算死草边度有朋友噶？凡事留一线，日后好相见嘛。

　　山草药，噏得就噏

　　san1 cou2 yêg6， ngeb1 deg1 zeo6 ngeb1　

　　饮惯凉茶嘅广东人，对山草药自然係好熟悉啦。山草药唔单止可以内服，仲可以外敷啵。不过旧时，一啲江湖郎中会胡乱用药，係又敷唔係又敷，而“敷”呢个动作，係粤语中又称为“罨”，谐音“噏”。“噏”嘅意思係说话，往往用于负面，多指不负责任地发表言论，例如乱噏、发噏风等。所以“山草药，噏得就噏”呢个歇后语，就比喻人胡说八道，信口雌黄。仲有就係，“山草药”也时常被写成“生草药”嘎。

　　造句：村口啲阿伯成日围埋一堆车大炮，正一山草药，噏得就噏。