成日话自己一件T恤可以着四季嘅广东人，也耐不住断崖式降温同落雨嘅双重魔法攻击，进入秋冬时节，都係要乖乖做好保暖措施啊！尤其係“怕冻星人”，更加应该常备保暖神器，咁就唔使成日手冻脚冻，到处请人“食冻柑”啦。

　　陈祉伶/文 品牌官网/图

　　办公暖笠笠

　　对于一日到黑要坐办公室嘅打工人嚟讲，虽话有瓦遮头，无惧风浪，但空气湿冷喺室内都会越坐越冷冰冰。尤其要忙住敲键盘、握鼠标时，一对手真係仿佛穿越咗去极地世界咁。呢个时候可以放番部迷你暖风机喺枱面，想要几暖就调几暖。仲有专门为“鼠标手”设计嘅拱桥式暖风机添，取暖之余，也可用嚟做美甲烘干。暖风机吹局部，发热暖桌垫就warm晒你成张台，从手臂到手心都能保持暖笠笠，趴低午休唔使再惊冻亲。既然上面“蒸松糕”，下面都唔好“卖凉粉”啵！正所谓“寒从脚下生”，天冻嘅时候，人身体嘅各个部位中，最需要保暖嘅就係对脚，所以“暖脚宝”也要备起来！比起只能对住一个方位吹嘅热风机，包裹式嘅暖脚器更能保暖，小巧体型仲好方便收纳噶。

　　素乐质造 暖脚神器

　　技触 桌面暖风机

　　苏宁易购 桌面取暖器

　　马克图布 暖桌垫

　　行走有温度

　　秋冬时节，行走在外，想要维持风度，唔好冻到狼狈地缩埋一团，咁就一定要保证自己够温度啦！暖手宝自然係“怕冻星人”最常见嘅“续命神器”，小小暖手宝捧在手心，温暖即时触手可及。而且市面上嘅暖手宝在颜值上仲越来越“内卷”，萌趣造型让人爱不释手，仲可以秒变凹造型嘅潮流单品。本身就有保暖功能嘅围巾，如果再加上智能调温科技，简直就係随身带上咗可移动嘅发热小暖炉。不显臃肿，又保有温暖，让保暖呢件事轻到没有存在感！而且上班对住电脑望得耐，颈椎发出疲倦警告时，也可以戴上围巾热敷一下，可以有效缓解疲累，超舒爽噶！

　　几素 发热围巾

　　SOTHING 向物 萌宠暖手宝

　　素乐 挂脖暖手宝

　　飞乐思 发热围巾

　保温好easy

　　要暖身先暖胃，秋冬时节气温骤降又干燥，最有效嘅保暖妙计当然係多饮热水啦。不过忙起工作时，装好嘅热水往往已经失嗮温度，重新去茶水间装过费时费力，而最紧要嘅係已经冻到唔想喐！呢种情况下，可以加热饮品嘅恒温杯垫就最啱使啦。大部分恒温杯垫都有几档调温功能，大家可以按自己嘅喜好选择加热温度，随时随地饮上适合入口嘅热饮。唔少新款恒温杯垫嘅接触面可以包容多种材质，轻轻加热盒装牛奶或者面包蛋糕都完全冇问题噶。需要外勤嘅时候，便携式加热杯就係一个好选择！普通保温水壶嘅size，却具备插电加热功能，小功率适合多种场合，让你轻松实现热饮自由。

　　大宇 暖暖垫

　　向物 智能恒温杯垫

　　乐扣 便携式烧水壶