chok爆的外型，包裹住有趣的灵魂，係邓智伟俾Color君最大的感觉。你可能对佢的名字冇咩印象，其实好多大家耳熟能详的粤语歌，都係出自佢之手。佢之前一直帮人作歌，最近就以“乐坛新人”的姿态从幕后唱到台前，仲举行咗自己的音乐会，等我哋一齐嚟认识一下“歌手新仔”邓智伟啦。

　　郭玮/文 受访者提供、秦丽莹/图

音乐有“平行记忆”

 　　  听到《幼稚未完》的时候，大家会谂起《黑金风暴》入面的情景；唱《连续剧》时，会想念同你一齐煲剧的老友；《别怪她》前奏响起，因为太多人唱过，你谂唔起边个係原唱，但就係会跟住唱……呢啲邓智伟创作的音乐作品，用音符记录咗好多人的回忆。邓智伟话，无论係剧集OST定係单曲，都可以係独立的个体，每个人听歌时候的经历唔同，属于你的记忆就会独一无二，所以佢就将个音乐会主题叫做“平行回忆”，希望大家喺他唱的作品中，搵到属于自己的故事。

　　智伟帮好多歌手、艺人制作过音乐，亦参与过大大细细的舞台制作，轮到自己的solo，当然会更加用心。佢精心准备的歌单中，传递咗创作时心路历程的好多massage，希望大家喺听show的时候可以get到。演出走过好几个城市，最令佢感触的，就係上海站的舞台——去到非粤语地区，仲可以收获到全场大合唱的情景，係佢始料未及的；仲有王祖蓝突然空降撑场，令佢非常感动。

代表作拣《幼稚完》

　　由帮人作歌到自己出嚟唱歌，邓智伟话，希望自己的show，可以俾大家见到每只作品最原始的样貌：“其实每只歌的demo都係我唱噶，我想俾大家见到佢哋啱‘出世’的模样。”要拣出最满意的作品？智伟即刻自信表示，首首都好满意哦，因为“音乐唔係运动，冇得比较噶”。喺智伟眼中，音乐係无分好坏的，每个听众喜欢的style都唔同，有人觉得沙哑的“烟嗓”好正，有人中意听清澈明朗的声音。如果一定要挑出最能代表自己的一首曲目，智伟就话会拣《幼稚完》，因为呢首作品係在自己的低谷期创作，当作品出街、被大家认可的时候，智伟感动到喊湿枕头，真系高兴过攞奖嘎。

做紧最想做的事

　　邓智伟被人赞为“TVB史上最年轻的音乐总监”，其实，佢儿时的梦想并不是音乐，係因为机缘巧合才开始往音乐方面发展。16岁开始，智伟梦想要开自己的音乐会，喺到处开show的日子里，佢日日都过得好开心，因为音乐就係佢自己最想做的事。除了音乐，邓智伟仲有好多令人意想不到的兴趣，例如，佢对煮嘢食的综艺节目、做情感博主或者栋笃笑表演，都非常感兴趣。佢解释话：有时候佢都会想放低自己的专业，等大家睇到佢的另一面。未来的日子，邓智伟会坚持追梦，继续用自己的音乐，为大家创造更多音乐回忆。