香港味道、香港艺人打造！无线艺人罗天宇、张景淳、李兴华三个型男最近成日去深圳，原来夹手夹脚开咗间港式鸡蛋仔小食店，要将正宗港味带到内地。店内有经典嘅鸡蛋仔、柠檬茶、碗仔翅……而且三位型男好似福利彩蛋咁随时现身，吸引咗唔少粉丝慕名而来。识饮识食嘅可乐君马上带大家去一探究竟！

　　

　　郭玮/文  冼颖樱/图

 

　　

　　“是蛋”求奇

　　

　　店内最招牌嘅原味鸡蛋仔，蛋液係用李兴华（kelvin）爸爸秘制嘅蛋液制作嘅。原本以为有工具辅助，加上定时按量嘅操作，制作一份鸡蛋仔係件easy job，点知原来针挑成品，吹风定型等步骤一啲都唔可以马虎。啱出炉嘅成品外脆内嫩，微甜不腻令人回味无穷。张景淳（Stanley）话无论係经典甜味抑或创意咸款，最基本嘅都係佢哋嘅秘制蛋液，係保证还原港味的关键。除咗各种口味嘅鸡蛋仔外，烤鸡翅、碗仔翅、咖喱鱼蛋等香港街头小食喺呢度都可以品尝得到,而两位主理人就推荐大家试下大大粒、Q弹软糯嘅“星光小巨蛋”同南乳味炸鸡翅，呢两款嘢食係店内特色，其他地方唔一定食到噶。

 

 

 

 

　　

　　整色整水

　　

　　食小食，点可以唔配杯茶饮？呢度的饮品都充满港味，奶茶坚持用港版材料，所以茶味比较重，仲有啲涩口；柠檬茶唔会笃碎个柠檬，酸度係可以由客人自己控制……呢啲“坚持”都係佢哋打造港味饮品嘅小心思。可乐君注意到，店嘅menu上一款叫“冻柠宾七”饮品，Stanley就话好多客人都会被呢个盏鬼嘅饮品名吸引，落单嘅时候忍唔住嘴角上扬。其实，呢款饮品係用七喜mix利宾纳调配出来嘅，再加入柠檬片调味，出餐之前再撒上少少海盐突出黑加仑的甜，成品呈渐变紫色，加上晶莹剔透嘅气泡，用来影相打卡就最出片啦。利宾纳喺内地比较少见，所以呢款饮品都算係特色港饮，值得一试噶。

 

 

 

 

 

　　各司其职

　　

　　罗天宇、张景淳、李兴华三人夹份开铺，初衷係佢哋都好中意食嘢。经历过艰难搵铺头、调整出餐方式等各种挑战，小食店终于有咗依家嘅成绩。平时kelvin会花最多时间，“游走”喺每间分店视察业务，好多经营上嘅问题都係佢解决嘅；而Stanley就擅长烹饪，“主厨”嘅重任当然就交畀佢啦；天宇除咗係店铺嘅形象大使，仲负责埋铺面嘅软装设计。佢哋特别喺旗舰店安排咗“采访区”，等啲艺人朋友仔嚟到，有一个专门地方可以食下嘢、倾密计。特别值得一提嘅係店内还有“第四把交椅”——包迎宾，佢係一只劲黐人嘅猫猫，不定时会出现喺店内冧人，大家嚟食嘢打卡，就可以偶遇佢啦！