春节就快到，恰逢今年係龙年。早前，识饮识食嘅Color带住鸿钧同观辰，去到中山学咗一门“有醉意”嘅非遗技艺——醉龙舞。鸿钧化身“醉熊”拜师，唔知学有所成未？

　　郭玮/文、图

　　形醉意不醉

　　龙舞，又称醉龙，係广东中山民间特有的一种舞蹈，佢起源于宋代，到明清时期兴盛起来，喺民间十分流行。呢种舞蹈原本係自发的即兴式跳神舞蹈，后来慢慢就发展成道具舞蹈，一般情况下，会喺农历四月初八浴佛节祭祀后，举行的巡游活动中表演。醉龙舞係一种融汇咗中国武术、南拳、醉拳以及杂耍等等技艺于一身嘅传统技艺，彰显“形醉意不醉，步醉心不醉”嘅精髓。2008年，醉龙舞就被列入国家级非物质文化遗产名录中啦。

 　　非遗传承人：黄金渐

　　拜师“醉”实际

　　鸣锣击鼓涨气势，号声响起，震耳兼且振奋人心。一声令下，传承人黄师傅持龙出击，摇旗呐喊、列队向前，龙头随鼓点进击，大阵仗好震撼。传承人借醉而舞，步履轻盈，龙头舞得飘逸，来到高潮一跃而起，跳到舞台中心嘅大鼓上翩翩起舞。大家正在为精彩舞步鼓掌时，传承人口含烈酒，借火把之势喷出熊熊火柱，现场气氛瞬间挞着，呢个moment就係醉龙舞最精髓嘅一幕，大家都被呢个红火瞬间深深惊艳……鸿钧喺台下观舞，被熊熊烈火震惊到连连拍手，同时又跃跃欲试，想体验下呢门视听都咁震撼嘅传统技艺，忍唔住要向传承人请教一番。传承人见演惯“石敢当”嘅鸿钧相当有慧根，决定“破格”收佢为“一日弟子”，将“第一把龙头”隆重咁交到佢手中。“立正开马”“前弓后阵马”“三升贺龙”“高龙饮酒”等有型又有代表性嘅招数，传承人都毫无保留咁传授畀鸿钧。唔知大家觉得我哋个friend啲姿势够唔够实际咧。

　　“醉”有情意结

　　以前，醉龙舞一般係人们喺节庆、假日聚餐之后，借酒肉之劲持龙头起舞，祈求村落风调雨顺、国泰民安嘅形式舞嚟嘅。气势非凡的醉龙舞，渐渐就发展为一种带有美好寓意嘅道具舞种。无论係过去或係现在，醉龙舞都维系住乡亲们世世代代的情意，充分体现当地的传统文化底蕴。了解过呢门非遗技艺嘅意义之后，鸿钧都呼吁时下嘅年轻人，多啲了解呢类咁有价值嘅文化财富，将醉龙舞当中宣扬嘅“龙精神”“龙文化”好好传承，喺保留美好寓意嘅基础上尽情创意，令佢更好地发展，不断焕发新姿彩。

　　Color提醒 《UP在湾区之港见粤闻》会继续带大家学非遗、品美食、玩转非遗手艺，如果想知下次轮到边位大咖带大家搞搞新意思，记得关注我哋啦！