水果甜美，大家都中意食！对于果皮，好似最近当季嘅橙子、柚子呢类柑橘类水果嘅皮，含有散发香味的“苎烯”，通常会被阿妈们物尽其用，放入冰箱做“清新剂”，而后生仔女就会拿果皮来玩，做成得意嘅零食盒。前段时间，有网友用柚子皮做成鸡仔造型，放喺台面过瘾得嚟仲有醒神香味，可乐君就发现改用橙皮嚟做，细细只都几精致嘎。

　　郭玮/文、图

　　拣橙有讲究

　　橙多汁甜美，多食可以补充维生素C。橙皮就含有大量嘅维生素A，可以健胃消食，喺好早之前就被古人用作中药，可治疗咳嗽、化痰。不同品种嘅橙，果皮嘅状态都会有所不同：新奇士橙够大只，皮厚但比较“脆皮”；冰糖橙的果皮又薄又韧，整体比较细粒；脐橙多数呈扁圆形状或者椭圆形，体积较大只，果皮薄得嚟好有韧性。对比完之后，好明显就係脐橙最适合用来“玩嘢”啦！个头大、果皮薄韧嘅特点，方便我哋制作出更好玩嘅细节。

　　制作小技巧

　　可乐君落手制作“橙皮鸡”之后，摸索出一啲制作小技巧。第一，大家拣橙嘅时候，要尽量拣外皮光滑、冇疤痕嘅橙子，这样制作橙皮细节时，就冇咁容易断开、裂开。第二，橙皮同果肉一样，一放就容易氧化，颜色变暗沉，拣橙嘅时候记得选颜色鲜亮啲嘅，成品都会靓仔啲。第三，橙子可以放至稍微脱水嘅状态下再开始制作，橙皮柔韧度会提升，延展性变得更好，就方便你“挤”出里面嘅果肉。做好的橙皮鸡可以放几耐？其实佢放置一段时间就会脱水变硬，变成一只“陈皮鸡”，样子丑萌丑萌，别有一番味道。

　　“橙皮鸡”驾到

　　1、划记号

　　喺橙子大概2/3的位置，用记号笔画一个果肉的“出舱口”。

　　2、开“舱门”

　　用水果刀沿步骤1画定嘅记号戒开果皮，然后注意手要稳，“舱门”要保留备用。

　　3、果肉“出舱”

　　用薄瓷羹从“舱门”边慢慢插入，小心地将果肉和果皮分离。

　　Tips：呢一步好考验耐心，小心不要损坏果皮。

　　4、修“舱口”

　　取出果肉后，用剪刀将“出舱口”边缘修剪平整

　　5、做细节

　　用“舱门”剪出“橙皮鸡”嘅手脚、眼睛、鸡冠等小“配件”，用剪短的牙签连接各部位。小眼珠直接用油性笔画就好啦！

　　6、成品

　　①可以放入搣好嘅橙肉，变成特别的摆盘。

 　　②可以摆糖果零食，成为得意的小糖果盒！