近几年，越来越多工业旧址经过重新包装，摇身一变成为年轻人都中意嘅“潮”圣地。大反差嘅新街区，新旧兼容嘅“双面”潮店，都可以俾到我哋打卡嘅新灵感，仲可以品尝新滋味，睇靓靓风景，hea足大半日。重点係，佢哋就喺市区，地铁公交轻松直达，一齐去旧厂玩出新路数啦！

　　黄译萱/文 饶禧、黄译萱/图

　　旧仓库藏买手店

　　新旧双拼

　　曾经，白鹅潭周围嘅珠江两岸係广州近代工业建筑最为密集嘅地方；依家，太古仓一带保存咗完整嘅仓库，成为广州最标志性嘅工业旧址。沿住环岛路往前行，漫步珠江边，除咗太古仓，你会见到一片极具工业风嘅区域——大阪仓1904创意园。上个世纪初，“大阪株式会社”码头喺度建立，留低咗少有嘅万方单体仓库和广州独一无二的日式古堡建筑。置身园区中，墙上嘅工业痕迹仍然清晰可见，用坡屋顶和小木百叶窗简单点缀嘅仓库安静地伫立喺江畔，大榕树下嘅灰色古堡别墅散发住清冷感。不过，旧屋已换新装，五彩鲜花、涂鸦门窗，伴随动感音乐，新旧并存的独特园区，让人不禁想去一探究竟！

　　拍潮look

　　漫步园区，我哋发现咗几间时尚买手店，唔少朋友都係专门过来打卡。现场就可以拣新衫、搭新look，然后顺便打卡同古堡、仓库和日落同框嘅机位，好啱约埋朋友嚟凹造型！呢度最独特嘅建筑係日式古堡，灰墙上挂着枯萎嘅玫瑰花，服饰店同保留下嘅红砖墙、木制楼梯和壁炉融合，陈设配搭精致又特别，听讲出名嘅说唱歌手都来光顾；另一边仓库中嘅买手店里，服饰更多係简约高级嘅黑白配色，傍晚时分，可以透过巨大嘅库门和木框窗，欣赏到江边日落。店内的五彩花窗是热门嘅打卡点！有意思嘅係，呢度几乎每家店铺都係服装店、咖啡店嘅集合体，一下子满足女仔嘅三个愿望：逛街买衫、打卡出片、休闲high tea！随便坐低都可以叹啡、吹江风、睇日落，难怪呢度会成为大家最新嘅约会地点。

　　老厂房变潮hood

　　潮逛街区

　　“1906科技园”里仲有好多“潮到风湿”嘅街区，琳琅满目嘅网红美食令大家大饱口福。离地铁站最近嘅赛博朋克街区，係饮茶叹啡一条街，街道挂满如星球般嘅彩灯，企喺度仿佛置身科幻世界。再往里行，就係烟气腾腾嘅后街，各种酥香热辣嘅“江湖美食”目不暇接，夜晚缤纷嘅彩灯亮起，此刻嘅烟火气到达顶峰。另一头嘅10号工坊街区，曾经係广州卷烟二厂嘅实验工坊，保存过往工业印记嘅同时，筑起极具现代感嘅大楼梯，旁边嘅榕树街宁静悠闲，来呢度放空、叹茶、散步、吹风，最合适不过。

　　刷“活力橙”

　　从陈家祠地铁站A口出来，活力嘅“1906科技园”实会吸引你嘅眼球！呢度係广州中烟卷烟二厂，1949年由爱国华侨实业家简姓兄弟创办，兴盛时期，广东六大名烟都喺度生产，后来历经更名、迁址，呢度嘅旧址只剩低围墙同厂房。到咗依家，呢片藏喺市区嘅天地重焕生机，工业风建筑刷上张扬温暖嘅橙色，摇身一变成为充满朝气嘅潮玩新地标。步入露天式街区，有几处“橙色打卡点”千祈唔好错过，比如横跨中央广场上空嘅时空连廊、千米长“爱玛仕橙”漫步连廊、南广场几何感十足嘅橙色楼梯，行走喺chill爆嘅橙色空间，会令人感到充满活力。