晨早起身，嚟翻碗热气腾腾嘅豆浆，饱腹又暖胃，搭配翻油条，经典唔会出错。不过近几年，豆浆已经不单止係“传统早餐伴侣”，有啲商家推出咗新鲜奇特嘅豆浆新食法，令佢哋可以一日四餐都啱食，花样多多食唔厌。快啲跟上，Color君带你去叹豆浆！

　　

　　饶禧/文 黄译萱/图

　　

　　炭炉配烤鱼

　　

　　人来人往的天河体育西路边，有一间炭炉豆浆店，店内原始、古早嘅石磨豆浆方式，吸引咗唔少过路人入内。店铺门口摆着老式炭炉，熬煮出一碗碗浓醇嘅豆浆，令人一秒回归童年。店家每日都会用新鲜嘅黄豆磨汁，再倒入老式炭炉里，现场用明火熬煮；煮开时，加入鸡蛋，豆浆即时醇厚嫩滑、豆香四溢；收火后，放入油条，油条吸满浓郁豆浆变得多汁饱满，入口香味蔓延舌尖，令人忍唔住多饮两啖。如果经典搭配仲未够喉，不如加点一条新鲜嘅豆花烤鱼，鱼皮酥脆、鱼肉嫩滑，加翻碗无限续嘅豆花，饱肚又美味。

　　芋圆豆浆

　　店名：付师傅豆花烤鱼

　　地点：天河区体育西路79号

　　营业时间：周一至周日 11:00-次日02:00

 

 

 

 

　　深夜一人食

　　

　　喺天河石牌村居民楼里面，藏着一间“深夜豆浆铺”。每当夜幕降临，忙碌嘅打工人落班，店铺着起暖黄灯，暖人心扉嘅豆浆此时出炉。新鲜豆浆，可以无限添加软糯芋圆同Q弹珍珠入去，即时变身豆浆甜品，食起身更饱肚，丰富口感给你大大嘅满足。经典嘅油条被做成小份油条形状，一啖一个脆卜卜，啱晒一人食嘅分量。店铺内装饰文艺，除咗碗内有暖心文字，墙上仲贴住“深夜的酒不如凌晨的豆浆”，店家希望大家可以将卖醉嘅酒换成营养嘅豆浆，用健康方式享受一人之境。有时，店内仲会邀请歌手驻唱，听歌饮豆浆，度过一个健康又舒适的夜晚。

　　

　　店名：小田豆浆

　　地点：天河区石牌村豪居口巷4号

　　营业时间：周一至周日 07:00-次日02:00

 

 

 

 　　鸡蛋豆浆&芋圆豆浆

　　　　

　　搭配花臣多

　　

　　讲到大排档豆浆铺，唔少街坊都会提起泰沙路嘅“裕兴豆浆”。一碗豆浆、一份油条，经典搭配係食客们嘅入门必点。除咗斋豆浆，店铺仲有两款味道奇特嘅豆浆值得尝试：榴莲豆浆融合淡淡榴莲味与豆香，口感唔会过于甜腻或者突兀；好好咬嘅珍珠豆浆令你“食”得有滋有味。除咗油条，呢度准备嘅小食、茶点可谓五花八门，门口就摆住热气腾腾嘅蒸笼，毋须去到茶楼就可以食到正宗嘅早茶点心；店内仲有唔少潮汕风味小食，例如普宁豆干、潮汕肠粉等，材料鲜分量足。豆浆搭埋各地特色小食，一餐落嚟都食唔够。

　　

　　店名：裕兴豆浆茶点

　　地点：海珠区泰沙路8号101铺

　　营业时间：周一至周日 17:30-次日07:00

 

 　　珍珠豆浆&榴莲豆浆