近日，阿Ken洪卓立空降广州，同可乐君chill游后，又惊喜现身busking，有咁多互动机会，粉丝们都好开心。原来，阿Ken从旧年开启嘅“ The other planet另一个星球”巡回音乐会，今年4月即将迎来尾声。正如阿Ken唱嘅“心酸往事停在心头”，今次佢带我哋来到“另一个星球”，听佢嘅靓声“甜在心头”。

　　郭玮/文

　　受访者提供/图

　　重新出发

　　2022年底，阿Ken举行“说故事的人”巡演后暂别舞台。旧年，佢收拾好心情，调整好状态后，带住新个巡演“The other planet”回归舞台。喺每一个新嘅舞台上，阿Ken继续通过自己嘅音乐作品，唱谈自己经历过嘅故事，分享一个个励志的瞬间。佢将演出主题定为“另一个星球”，寓意自己将重新出发，带住歌迷粉丝坐上时光机，漫游佢嘅音乐宇宙，遇见新“星球”上全新嘅自己。经历病痛、跌落低潮，能再次站在舞台上唱歌俾大家听，阿Ken感慨万千。尽管自己状态未恢复到最perfect ，但阿Ken应承大家，一定会努力再唱落去。

　　与爱同在

　　好多人话，听阿Ken唱歌就好似睇电影，好有画面感同故事情节，甚至係身临其境。听《弥敦道》，就仿佛孤独企喺马路边，等紧人与车暂停；响起《少年游记》，会撩醒你沉睡嘅初心，再次充满勇往直前嘅冲劲；如果听《带着骨灰去旅行》，大家都好容易会泪目，挂住曾经嘅承诺与最爱；《回到最爱的那天》带人重温人生，“复习”自己好多“第一次”，见证自己难得嘅心跳与悸动……喺今次“The other planet”嘅歌单上，阿Ken好有心思，让每一站都有一个“小惊喜”，微调嘅曲目，係佢想要传递俾大家嘅signal。佢感恩一路以来有粉丝嘅支持，希望每一次音乐响起，都同观众有互动，从作品中一起品味人生。佢话俾大家知，宇宙虽大，有佢陪住你，你就唔会孤单。

　　展望未来

　　“The other planet”即将去到最终场，Ken为每一次嘅舞台都set定一个“小主题”，关于“珍惜”，係佢感恩大家嘅期待，珍惜眼前嘅所有机会；到咗“坚持”，就係佢努力成就自己，不负每个信任佢嘅人的决心。最后一站，Ken将主题定为“洪卓立”，要用歌声带大家从“另一个星球”回到地球，回到最爱的那天，佢可以搵翻初心嘅自己，亦让大家可以见到最真实嘅佢。每一次嘅演出，Ken都希望大家可以有收获，唔知呢一次，佢会“送”啲咩俾大家咧。Ken仲话，新作品佢已经准备紧啦，大家一起期待下啦。