九月初，广州咖啡圈嘅年度盛事——“咖势”国际精品咖啡文化节（后简称“咖势”），踏着热浪而来！今年，“可乐生活”22岁，“咖势”7岁，后生仔女都中意埋堆玩，所以我哋约埋喺海心沙“庆生”！可乐君今次做埋摊位“主理人”，带住限定嘅粉丝福利，连续三日喺现场同粉丝零距离互动，带沉浸式叹啡！大家咪走鸡，一起来睇睇我哋玩咗咩啦！

　　黄译萱/文、图

　　见明星、攞福利

　　今次可乐君就“咖势”开摊卖报纸，特意带埋限定福利过去，一次过满足大家攞福利、“见明星”两个愿望。《可乐生活》明星封面一字排开，大家一眼就可以揾到你心水嘅明星。可乐君带过来的限定福利中藏咗小心思，粉蓝色嘅汽水风透扇，扇出阵阵凉风；粤语潮语贴纸，印住“得闲饮茶”嘅约定以及“鸠鸠史”“劲抽”“正”等赞美之词，睇到都开心；庆生限定嘅帆布袋，大容量又高颜值，帮大家装住得意嘢。今次开摊，唔少老朋友专门过嚟打卡，有人一路猛影相一路嗌：“我中学时睇嘅报纸啊！”有人拖住仔女过来介绍：“呢份报纸阿妈从细睇到大……”我哋嘅friend“筷子基”第一日就来打卡，大赞我哋嘅透扇好清凉。有fans二话不说就扫码下单，即时买返份《可乐生活》走。有fans话，报摊少咗难买到“可乐报”？其实，喺微信小程序“票巴网”、淘宝店“羊晚生活馆”、邮政服务号“中国邮政微邮局”，就可以买到。趁住线下见面机会，可乐君仲听到大家好多建议，关于栏目、想见嘅明星、想睇嘅show、想玩嘅嘢……最好的爱从来都係双向嘅，感谢大家一直以来嘅支持！

　　“啡”常味，够地道

　　“粤语课堂”係Color嘅生招牌，睇下我哋全新嘅粤语潮语贴纸就知道了，啱key嘅朋友即刻一起“贴贴”。今年嘅“咖势”有唔少“本地啡”一齐嚟宣传粤文化，制作风味独特嘅特调，广东仔女一饮就知係唔係“自己友”。比如来自顺德嘅REC Lab.咖啡，将传统广式甜品双皮奶融入咖啡，一杯“鬼佬双皮奶”Dirty，把顺德水牛奶嘅浓醇奶香发挥到极致；无事生啡嘅“入伏前的消暑”特调更有创意，玩转药食同源，将阿妈最钟意嘅煲汤料之一——五指毛桃加进咖啡；钟意食番茄牛肉通粉嘅朋友，绝对要试下“番茄牛牛”，唔少人饮完都话：瞬间梦回‘0909’”！除咗特别嘅“啡”常风味，咖啡主理人仲係跨界达人，将咖啡周边玩起来！来自佛山嘅嘉啡狮咖啡，推出传统石湾红锟釉瓷杯，揸住佢去叹啡，够晒“姿整”；无牌咖啡嘅周边年年都好受欢迎，继省镜、“省 Hok”之后，今年佢哋带住“省盆”“省袋”嚟，摊位充满市井味，随便一拍都够架势！

　　　　番茄牛牛　　鬼佬双皮奶

　　“冠军啡”，高浓度

　　今年“咖势”特别正，有可乐君同大家畅饮，带住一手资讯陪大家玩到尽！场内有11国、34城嘅咖啡香扑面而来，可乐君发现，今年咖啡节嘅“冠军浓度”持续升高，唔止有广州“地头蛇”、其他省市嘅“过江龙”，仲有好多外国嘅型男咖啡师嚟参展，入场就可以一次过品尝全球冠军嘅手艺，难怪聚集最多外地咖啡品牌嘅C区，一早就排长龙。咖啡节嘅体验环节加入更多好玩嘅互动环节：特展区嘅乔治队长，唔单止有冠军豆，更开设10分钟“流水席”，一边讲解一边带大家见证咖啡诞生；全新嘅全明星手冲吧台区域，带大家体验“手冲马拉松”，平时喺网上见到嘅冠军咖啡师，就企喺你身边，从磨豆粗细讲到水温控制，认真过瘾！手心咖啡嘅视障咖啡师仲会帮你按摩，就好似咖啡师用手心感受冲煮温度一样，令你全身充满暖意。松完骨再饮杯手冲咖啡，可乐君觉得“成个人都通晒”！

　　体验个性按摩