英皇娱乐（英文缩写“EEG”）概念店开到嚟广州啦！千呼万唤先开张嘅“蛋记”，究竟有咩好玩嘢？里面有几多嘢值得入手？喺“蛋记”广州店开门迎客第一日，可乐君嚟帮大家探店，仲有明星店长带住我哋沉浸式搜罗好物，帮大家mark实晒打卡要点！

　　pose最紧要chok

　　店长阿Wing係我哋今次探“蛋”嘅“导购员”，知道可乐君最中意影靓相，第一时间就带我哋去到入门右手边第一个打卡位——烘焙作坊！除咗有抢眼鬼马嘅巨型烤箱模型，仿厨房式设计嘅墙壁贴满代表艺人形象嘅卡通海报，你可以翘手扮饼店老细，又可以叉腰做拣面包的顾客，无论摆咩姿势都超出片。面包铺咗一整面墙，边度都係出片打卡位，面包仲係可以解压嘅捏捏材质，闻起身有香香甜甜的味道，不过记得“just for fun，not for eat ”啊！阿Wing同我哋讲，“蛋记”会有唔同主题，“烘焙”係今次广州店嘅特别设计，以后仲有大把新玩法等住大家。为咗即将到来的谢霆锋广州演唱会，店内set咗个专属角落，俾大家提前体验霆锋嘅chok爆舞台，电吉他、复古电视、演出海报等样样齐，想拍霆锋同款靓相，真係话都冇咁易。

　　　　“一日店长”汤颖琦

　　买嘢一定要搏

　　“蛋记”最受欢迎嘅单品，绝对係抽卡！一个硬币就可以带玩家感受“满怀期待”“忐忑不安”“欣喜若狂”“心灰意冷”等情绪，够晒过瘾。如果抽到嘅卡唔係自己嘅心水，大家可以大胆尝试同其他玩家换 ，分分钟可以“配对”成功，双方都可以get到自己最爱。除咗抽卡，“蛋记”仲有各种盲盒可以玩，锁匙扣、行李牌、卡套，样样都充满神秘感，每次拆袋都係一次心跳体验。当然啦，如果你唔想铺铺搏运气，明盒商品一样好吸引，Q版卡通形象、真人样款色任君选择，T恤、手袋、揽枕、文件夹实用性超强，贴纸、徽章、冰箱贴精致有细节。阿Wing仲透露，“蛋记”广州店有啲商品係全新设计，有啲仲係限量发售嘅，中意嘅朋友记得搏命冲，机不可失。

　　导购梗系要索

　　“明星一日店长”活动，都係“蛋记”最吸粉嘅环节，可惜只有开张首日先有。当日，几位靓声歌手们化身“导购”，落场服务大家。趁住关智斌官宣开show，现场更有巨型关智斌打卡装置，消费者可以进入装置里面，同巨型“Kenny”亲密接触。仲有个惊喜消息话俾大家知——英皇歌手们会不定期喺“蛋记”所在商场举办busking、快闪等活动，大家以后嚟呢边，除咗可以逛街、购物、打卡，仲可以顺路睇show娱乐，节目更加多姿多彩。继关智斌之后，泳儿、Daze in White乐队都有到店打卡，相信以后“蛋记”仲会有更多精彩活动，记得留意“可乐生活”嘅报道啦！

　　关智斌&DAZE IN WHITE　　DAZE IN WHITE