以往大家熟悉嘅係演员胡定欣Nancy，係《拳王》里面嘅“最佳女配角”，仲係《城寨英雄》中的“最佳女主角”。但今年佢以“歌手”身份重新被大家认识，开启自己嘅内地巡回音乐会。9月嘅第一个周末，Nancy喺广州音乐会嘅舞台上，同歌迷预祝这自己嘅生日，并许下生日愿望。

　　突破！从“Cover Girl”到封后

　　Nancy回忆，攞到《TVB周刊》嘅“Cover Girl”选举冠军后，自己曾有机会去录音房试音，但因为经验尚浅，最终未能如愿。咁啱嗰时又有新选择，佢就拣咗先入艺员训练班学习演戏呢条路。期间，佢识到好多有经验嘅前辈，从佢哋身上学到演技，慢慢咁正式以“演员”身份入行。演艺经历令Nancy尝试唔同感觉嘅角色：亦正亦邪嘅“婠婠”，刁蛮任性的“方倩汶”，聋哑但坚强的“丁恩慈”，奋发努力的“姜蓉”，个性飒爽的“章琳”……成为“最佳女主角”，Nancy付出咗好多努力，而寻求突破，係佢不断进步嘅动力。Nancy话好多人都只睇到佢风光亮丽嘅成绩，因为背后默默嘅努力佢习惯唔会多讲，好在屋企人一直係佢最强大的后援。

　　　　《大唐双龙传》“婠婠”　　《鬼同你OT》“姜蓉”　　《拳王》“丁恩慈”　　《楼住有情人》“方倩汶”　　《破毒强人》“章琳”　　《拳王》“丁恩慈”

　　转弯！开麦重拾歌手梦

　　Nancy自细就中意唱歌，所以17岁时佢就去参加咗歌唱比赛，更成功进入“四强”。近年，佢终于有机会举行自己嘅音乐会，可以话係重拾翻自己曾经嘅梦想——虽然入行后有唔少机会可以唱歌，但Nancy不得不承认，唱歌比演戏难好多。依家重新系统咁学习唱歌，令自己好似重新认识“胡定欣”——“重生”成为歌手嘅胡定欣。虽然Nancy有少少跳舞功底，但佢仍然要重新学习下点样唱跳、换气。唱歌係一件可以表达自己情感嘅事，所以Nancy始终觉得，就算几多次翻唱其他人嘅作品、演唱电视剧影视原声都好，未有一首真正属于自己嘅歌曲，始终係个小小遗憾。如果有机会，佢好想自己创作一首完全属于自己的作品。

　　圆梦！喺广州“隆重登场”

　　讲起嚟广州开show，Nancy直言“好期待”“我终于等到啦”。演出当日，除咗表演嘉宾谭俊彦外，Nancy嘅家人、圈中好友刘佩玥、张彦博等全部到场为佢打call。当晚，佢喺歌迷、影迷嘅期待中，以劲歌热舞《隆重登场》，又将《祝君好》当成祝福送俾大家，把《我们都是这样长大的》变成自己同粉丝的成长录……与剧中“哥哥”马德钟合唱《岁月如歌》，更令全场梦回电视剧《冲上云霄》。喺现场倾诉心声嘅时候，Nancy谂起自己喺演艺圈一路走来，忍唔住啜泣，多得有大家声声“加油”，令佢喊住笑返。趁住自己生日就快到，Nancy同粉丝一起许下生日愿望，希望所有人都可以enjoy自己所爱，好似佢可以如愿开个唱咁，做到自己想做的事。