每个城市嘅春天，都有佢独特嘅风景，北京嘅春天花景令人心驰神往。首钢园嘅冷却塔与粉樱相映成趣，慈禧钟爱嘅白玉兰喺颐和园乐寿堂外开得灿烂，小武基公园嘅白色樱花构筑出梦幻漫画场景…… 趁着春天，我们去北京探花游园！

　　郭玮/文、图

　　潮玩古韵

　　颐和园係慈禧太后嘅避暑颐养之地，因佢曾被封“兰贵人”，所以对玉兰花情有独钟，颐和园内就种咗好多玉兰树。乐寿堂前嘅百年白玉兰正在盛花期，洁白饱满嘅花朵，同园内嘅金边红窗特别相衬，除咗皇家园林嘅恢弘气派，玉兰花亦成为呢个季节最吸睛嘅景致，引得游人纷纷驻足打卡。故宫午门前嘅柳树亦好有睇头。柳絮浓密如流苏，喺北京暮春嘅微风中摇曳，令见证过末代皇朝岁月嘅红墙城楼，更添几分明艳。故宫气势恢宏，随手都能拍出大片，cos成皇室成员拍照已经成为出片嘅基本操作。宫内嘅“御猫”精灵鬼马，近期仲有网友发起“故宫寻猫”嘅小游戏，令游故宫又多咗一番新乐趣。

　　巧试新趣

　　古园中嘅百年花木自带韵味，京城嘅新派打卡点亦有惊艳花景。北京首钢园将硬核工业同现代艺术融合，三座废弃嘅冷却塔被改造成运动空间，繁密嘅白樱喺“石屎巨兽”前盛放，刚柔碰撞更显温柔动人。大跳台“雪飞天”形似巨型高踭鞋，又似划破天际嘅彩虹，只有置身跳台下，先可以真切感受到佢嘅高大威严。同欢乐谷一街之隔嘅小武基公园，係北京市民日常休闲嘅好去处。最近园内嘅樱花盛开，漫步粉红色樱林之中，飘落花瓣变成头上嘅装饰，氛围感拉满。环球影城正值淡季，园内人流较少，玩起身更悠闲舒适。就算唔玩机动游戏，漫步各个主题园区，赏绿植、睇樱花、打卡影相，都一样惬意。最后用花车巡游收尾，踏住音乐嘅欢乐节奏，同每一位卡通人物say hi、花式比心互动，为“环球之旅”画上happy ending。

　　舌尖挑战

　　京味小吃都越来越多“花”臣。樱花酥、桃花饼，係北京最具少女心嘅手信；枣花酥用红曲点成的花蕊，堪称点睛之笔……中式酥饼造型精致、滋味鲜香，搭配中式茶饮或西式咖啡都好啱key。豆汁向来係外地游客最想挑战嘅北京味道，商家将豆汁制成雪糕，卖相与口感都更易接受，入口冰爽酸爽，发酵后嘅独特风味经冷藏后更柔和一啲。北京果脯花款多多，苹果脯酸甜开胃、桃脯烟韧有嚼头、梨脯甜到离谱都又好上瘾……佢哋花哩碌嘅包装，用嚟送礼或者自己食都十分赏心悦目。仲有老铜锅涮肉、老酸奶、烤红鳟鱼、爆肚等京味美食，纷纷推出新口味与创意食法。今次赴京，不止能回味旧时滋味，仲可以touch到全新体验，“京”喜满满。