明年就係“关家姐”关心妍出道25周年，为咗庆祝呢个有意义嘅moment，佢将举办《听》巡回演唱会，用巡演方式与歌迷一齐回顾青春。今次巡演首站拣喺广州，既因为呢度係佢音乐梦想起步之地，也因这呢度有佢食过返寻味嘅地道滋味。

　　郭玮/文  受访者提供/图

　　用音乐忆青春

　　关心妍表示，好多歌迷係听住佢嘅歌长大，迷惘时有佢嘅歌陪住emo，揾返自己时会用佢嘅歌嚟庆祝，得到幸福时播佢嘅歌做BGM。不知不觉间，佢嘅歌串起咗一啲人嘅人生片段。《听》巡回演唱会，不仅係佢唱歌俾大家听嘅舞台，更係佢用歌声陪大家重温青春、再走一次成长路嘅旅程。广州中山纪念堂係佢第一次举办内地个人show嘅地方，係佢梦想开始嘅舞台，再次企上呢个舞台，关家姐话将以全新嘅服装造型和最top嘅舞美设计，俾大家一个值回票价的视听体验。此次《听》巡演会由广州出发，除咗会去到南方多个城市，仲会首次去北方城市演出，为歌迷送上靓声。关家姐兴奋咁表示，自己已经密锣紧鼓练歌、keep身材，希望以最佳状态呈献最好嘅舞台。

　　用行动传递爱

　　关家姐已有好长一段时间冇推出新嘅广东歌，佢解释话，希望新嘅作品能够传递到力量俾人，而非单纯表达自己嘅音乐理念。得知有外地年轻歌迷特意学粤语、学唱佢嘅广东歌，佢觉得“港乐”、广东话因此得以传承同传播 ，感到十分荣幸且有意义。关家姐长期投身公益活动，作为‌香港 “杰出义工” 代表，最近获聘为首批 “粤港澳大湾区志愿服务代言人”‌。除咗公益活动，佢仲会花时间陪囡囡“心心”参加佢钟意嘅运动，当佢望住小朋友喺运动场上拼搏嘅身影，就会忍唔住封佢哋做小偶像。谈及“粤BA”热潮，关家姐表示好想揾个机会，带囡囡去现场感受运动精神，等佢可以为赛事加油打气，喺音乐领域以外，将爱与力量传递到更多地方 。

　　用味蕾sell广州

　　自细在外求学嘅关家姐，对煮嘢食有独到嘅心得。最近，佢发现大家除咗钟意听佢唱歌，唔少人仲钟意睇佢下厨。钟意煮嘢食又钟意食嘢嘅关家姐话，广州係一个好好味嘅城市，葱油鸡係佢每次嚟广州嘅必食菜，广式点心嘅叉烧酥亦深得佢心，每款“广味”喺佢心目中都有对应嘅top one餐厅。关家姐平时要做身材管理，好少食米饭，只有开show前先有机会大快朵颐，用米饭补充能量，应付开show嘅舞台消耗。佢特别提醒5月16日去《听》演唱会现场嘅观众，记得食饱饭先入场 ，事关需要大家一齐合唱一齐嗨，尽情享受属于你哋同关家姐嘅青春回忆。