|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
在冬奥效应持续发酵下，大家对相对小众嘅冰雪运动都产生咗浓厚兴趣，“冰壶”就係其中一项。“冰壶民间分会场”有好多“能人异士”，已经早早自发投入制“壶”行列，杯盆碗碟、瓜果蔬菜都上阵，睇到大家眼擎擎，搞笑得嚟又好佩服佢哋嘅创意。今期Color都行“冻”起来，DIY真“冰”壶，首届Color杯“冰”壶锦标赛现在开打！ 郭玮/文 郭玮、陈沅滢/模特 陈祉伶、人民网、品牌官网/图 冷知识·冰壶唔係“冰” 开波之前，都要同大家正经科普下，真正嘅冰壶唔係冰做噶！冰壶嘅主体係一舊灰色嘅石头，材质係一种特别岩石，介乎于花岗岩与正长岩之间的过渡区域。因为制作冰壶嘅岩石产地少，加上佢嘅制作工艺复杂，所以正规比赛用嘅冰壶售价颇高。比赛场上，投掷队员投出冰壶后，壶身会由于冰面摩擦而旋转，影响滑行嘅走向，队友需要“擦”走冰面嘅细小颗粒，改变冰壶运行轨迹同距离。呢个“擦”嘅动作叫做“扫冰”，既考验体力，又考智力：需要选手掌握唔同力度，令冰壶可以精准咁打走对手，或者占据优势位置，进入得分区。 行“冻”派·真冰上阵 专业冰壶价值不菲，有条件体验冰壶运动的场地也不常见，所以好多想体验呢个运动嘅朋友都选择“就地取材”，过下手瘾咁话，而占地空间更少的桌上冰壶也颇受欢迎。虽然网上有好多方便快捷嘅冰壶桌游可以买，但秉承爱喐手喐脚搞新意嘅Color精神，自己动手更过瘾！识玩当然要真冰啦，动煲动罉有啲大阵仗，用个碗整翻个mini款就最实际。再拣块光滑嘅平面，简易桌上冰壶大赛就可以开波啦！ 自家创立嘅冰壶大赛，想点玩就点玩：单人自娱，可以玩下科学实验，比较唔同冰块、唔同角度，边个可以滑得更远；双人PK就可以互相斗准头，睇下边个可以做C位大神……唔使拘泥规章制度，最紧要玩得开心！见我哋玩得火热，唔少围观嘅同事就喺隔离“出谋划策”，提议喺冰块度“添油加醋”，打造各种“口味”嘅冰壶测试速度，花样玩转冰运“冻”！ Party time·旱地冰壶咁样玩 “冬奥”余热未退，羊城晚报集团喺3月8日都嚟凑咗个“冰”热闹！一场旱地冰壶大赛轰烈打响，各部门都派咗隐藏Ace小公举出战。咪睇平时大家娇滴滴，比赛场上全部变嗮 queen！为咗增加难度，赛道增设三个唔同大细嘅龙门，“冰壶”通过的门数越多，分数越高。现场战况十分激烈：小姐姐用力一击，冰球就来势汹汹咁冲向龙门，点知原来姿势镇过实际，射偏撞框失分；后来出场嘅妹妹唔多自信，但细心出手反而一路过关斩将……最后，代表Color出战嘅小伙伴们仲嬴咗个二等奖添，认真犀利！ 记者结语：其实无论旱地定冰面，将运动融入游戏都可以锻炼身体、团结士气，有益身心，感兴趣嘅朋友仔，可以搵个机会试一试，桌面、冰面、旱地、甚至DIY都各有玩头噶！
