|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
|
《金宵大厦2》终于落下帷幕，其中压轴嘅《嫁衣》单元都吓亲唔少观众，胡鸿钧饰演嘅裁缝“小程”，用演技俾咗唔少惊喜大家！出道十年，作为演员，佢敢于挑战；作为歌手，佢坚持初心不变……今期Color邀到胡鸿钧作客，同大家倾下佢嘅逐梦之路。 郭玮/文 受访者提供/图 奇幻剧常客成定位 演员身份嘅胡鸿钧，话自己都会关注观众反馈，亦谦虚咁觉得，自己仲有好大嘅进步空间。Hubert话自己係性格吵闹嘅人，如果演绎自言自语嘅内心戏，或者係对白少嘅角色，佢会觉得难度比较大，因为要靠为表情、肢体嚟表达情绪。佢特别提到，当时担正演《十月初五的月光》中嘅“初哥哥”，就係一个好大嘅挑战。佢希望喺经典形象嘅基础上，做出自己嘅辨识度，为角色注入新的生命；另一方面，“初哥哥”係一个好好嘅机会，可以令大家认识到唔同嘅自己。今次喺《金宵大厦2》中饰演裁缝师“小程”，已经唔係佢第一次出演奇幻剧集，性格呆萌嘅“石敢当”，经常抑郁嘅“北河”……每个角色都有自己风格，Hubert讲讲下，仲笑咗出嚟话：“大家认为我适合呢类角色都好啊，起码係一个定位哈哈。” 无条件逐梦守初心 做艺人，原本并唔係胡鸿钧嘅童年梦想，唱歌、弹琴开始只係佢嘅爱好，因为机缘巧合走上呢条路。不过，无论如何，佢都心怀感恩，因为佢觉得每个人都有自己嘅步伐，只要知道自己每一日都在为目标努力就OK 了。Hubert 仲拣咗Eason嘅《无条件》嚟表达自己呢个moment嘅谂法：“同歌曲嘅内容无关，只是这一刻，我无条件咁追逐我嘅梦想！”疫情已经进入第三个年头，冇得同歌迷见面，係Hubert觉得最遗憾嘅事。佢都趁住呢段时间，静下心来思考未来方向，同时加紧创作：“希望疫情结束之后，可以去唔同嘅地方开演唱会啦！” 回归歌手有新尝试 暂时完成咗“演员”呢部分嘅工作，胡鸿钧会回归“歌手”嘅位置。将自己形容为一个“艺术工作者”嘅佢，觉得富有情感嘅作品，先容易引发大家共鸣。最近因为受到疫情影响，简简单单嘅面对面寒暄都变成奢望，Hubert将呢种情绪化作创作灵感，打造咗全新嘅音乐作品《如果一切即将毁灭》，呢首歌係关于一对恩爱情侣，到咗世界要毁灭嘅时候，都要奋不顾身抓紧对方……听落有啲唔多理性，但正因为有咗呢part感性，成个作品就显得特别浪漫。胡鸿钧仲专门邀请自己中意嘅导演帮拖制作MV，佢本人喺MV中再次挑战冇对白嘅角色，对佢嚟讲又係一次新尝试。 出道十年感谢自己 今年啱好係Hubert出道嘅第十年，佢最想感谢嘅人就係自己，佢觉得每个人都应该先爱惜自己，才能更好咁欣赏他人。未来嘅十年，佢都希望自己keep住初心，继续为自己嘅事业努力就无悔了，既然拣咗呢条路，就一定会对自己嘅人生负责！当然啦，胡鸿钧冇忘记粉丝嘅一路支持与关注，简单嘅问候，自制的小礼物都係佢觉得好窝心嘅事。Hubert最近翻咗嚟内地，计划会举行音乐会，等更多人认识到佢，如果有机会，佢都希望参加下音乐相关嘅综艺，不如我哋一起期待下啦！
