旧地新游 去动物园寻欢

　　提到广州动物园，好多广州仔女嘅第一反应係：“我细蚊仔嗰阵去过！”呢个神奇嘅地方，绝对係广州人童年回忆嘅一部分。前段时间，因为齐刘海狮子“阿杭”、饮老火汤嘅猩猩等趣闻，呢个童年必打卡景点，被大小孩们重新关注。其实，广州动物园一直都有与时俱进，係个时睇时新嘅宝藏景点嚟嘎！

　　黄芷晴/文 

 　　  许建琳/通讯员 

 　　  黄蕾/模特  

 　　  秦丽莹、广州动物园提供/图

 　　

可爱新丁嚟报到

　　凶猛如老虎狮子，憨厚如犀牛河马，无论咩动物，幼年时期嘅佢哋总係可以轻松俘获男女老幼嘅芳心。近段时间，广州动物园都增添咗唔少新成员，非常之生猛咁喺动物园里面扎扎跳，就算烈日炎炎唔想喐，见到佢哋都觉得充满活力。中国本土物种界嘅川金丝猴，同霸道嘅猕猴嘅唔同，佢白金色嘅毛发，令佢睇起身多咗一份温柔亲厚。而动物园中两只新出世嘅川金丝猴幼崽，静处乖巧可爱，一上树就即变“百厌星”，时时刻刻都喺度探索世界，一阵爬树桩，一阵又倒挂喺树枝上，敏捷又调皮，令游客忍唔住停低脚步，望多两眼。佢哋叫咩名？将会由你哋话事！作为猴山嘅“团宠”，动物园最近会面向社会为佢哋征名。除咗金丝猴幼崽，河马“冲冲”“泳泳”一家也有新成员，佢哋仔仔“柒柒”先三个月大，分量已经唔嘢少，但胆子比较小，见到生人好怕丑。动物话咁快就会大个噶啦，想睇可爱动物幼崽，就记得抓紧时间嗱嗱声出发啦。

 

 

 

 

 

互动多多乐趣多

　　好多人会觉得去到动物园得个“睇”字，趣味性好有限。而为咗保护动物、游客以及物种之间嘅底线，广州动物园并不鼓励人与动物有身体接触。为咗打破呢个僵局，又吸引更多游客去了解野生动物嘅魅力，动物园都谂咗好多计仔，生鬼嘅互动打卡装置就係其中一样法宝。现在除咗可以一睹“洗剪吹界网红”白狮阿杭嘅“芳容”，在动物园仲可以喺“发型狮”装置合照留影，留低最型格嘅打卡记忆。在不同的角落里，动物雕塑、涂鸦等打卡位置，会俾我哋唔少惊喜。而最受欢迎嘅动物互动项目，仲係喂长颈鹿。喺专门的平台上，游客可以缩短同长颈鹿的身高差，亲手喂佢哋食树叶，你可以感受到长颈鹿嘅鼻息，吹动你手上嘅汗毛，近距离观察到佢哋又长又灵活的舌头，仲可以见到长颈鹿为咗美食“争风吃醋”嘅有趣场景。为咗长颈鹿嘅健康着想，呢个喂食项目每日都係限时限量开放，去之前记得提前做功课，费事摸门钉啵。

 

 

 

 

 

动物身世好盏鬼

　　行入动物园，你就知道每一只动物都有独特魅力，值得你去了解。例如，广州动物园嘅大象兄弟点解会被叫作“官二代”？因为佢哋嘅爸爸、妈妈分别系印度同越南送给中国嘅国礼；早前刷爆朋友圈嘅“内环鹿”係点回事？原来动物园运送嘅长颈鹿标本，生前係园中长颈鹿群嘅King海朗，现在安放园内科普长廊里面；怕老婆嘅却又同“二奶”生仔嘅马来熊，会为权力争斗而断尾、残缺却依然能成为“女王”嘅狐獴“奥莉”……多啲了解野生动物，就会发现多啲精彩故事，动物园里简直处处有宝藏。Color仲发现，动物园呢几年仲策划咗好多特色活动，想令更多人认识到生物多样性嘅重要，希望大家从了解到喜爱，慢慢生出保护动物的决心。唔係得珍稀动物先值得去保护，每一个野生动物都係我哋珍贵嘅地球邻居，咪等到快失去，先开始珍惜。　　

 

 

 

Color提示：

　　虽然广州动物园开放时间係8:00-18:00，不过好似华南虎、大象这种猛兽类动物，会在每天16:30左右吃晚饭，晚饭后就好少会出来走动，所以想见佢哋，就唔好太迟入场啦！