|
|
|
正所谓不时不食，立秋后，菊香蟹肥，正係食蟹嘅好时候。黄油蟹、奄仔蟹、大闸蟹……各有各滋味，为食猫们忙住沉浸在蟹黄膏肥的美好当中。粤语中，都有好多关于蟹嘅讲法，扮蟹、软脚蟹、倒泻箩蟹……呢啲 “蟹言蟹语”，你识几多咧？ 陈祉伶/文、图 郭玮、黄芷晴/模特 扮蟹 ban6 hai5 螃蟹在售卖前一般会用草绳缠捆好，既避免走失，又保护咗肉质，最紧要係防止咗蟹钳伤人。“扮蟹”最开始嘅意思，就係用嚟戏称嗰啲被人好似捆螃蟹一样五花大绑嘅盗贼，不过如今“扮蟹”的词意已经“大变样”啦。粤语中嘅“扮”有演绎、模仿之义。而打横行嘅蟹，睇起身霸道又另类，所以时下的“扮蟹”多数用来指他人特别做作、装腔作势。 造句：你几斤几两大家唔知咩？唔好扮蟹啦！ 水蟹 sêu2 hai5 大大只嘅蟹，未必就係膏满肉肥噶，水蟹就係典型例子。作为青蟹中的最次品，水蟹外表虽然好大只，但係煮熟后拆开佢，你就会发现入边水汪汪咁，肉少又难剥。所以“水蟹”通常用嚟形容徒有外表，却冇实际能力嘅人。不过话番转头，肉少嘅水蟹味道几清甜嘅，识饮识食嘅广东人，就会用水蟹煲粥，通常用嚟做宵夜。 造句：你睇佢大大声，其实水蟹嚟嗟，如果真系有料，使乜周围唱啊。 老虎蟹 lou5 fu2 hai5 老虎蟹一般係指头胸甲呈蛙形，壳上有花纹的一种螃蟹。不过喺粤语中，如果将“老虎蟹”当作副词使用，并冇什么实指的意思，而係起到加重语气、增加气势的作用，暗含“无论如何、不顾一切”的意思。呢个词常以“老虎蟹都要……”的句式出现，一般可以与“几大都要……”换着用。 造句：准备得咁充分，今次考试我老虎蟹都要攞第一噶啦！ 软脚蟹 yün5 gêg3 hai5 成熟嘅螃蟹靠近蟹身嗰一节脚比较硬，如果捏唔喐，多半係一只好蟹，如果捏得喐，咁呢只蟹可能仲太嫩或者品质不太好。粤语同上海话都有“软脚蟹”一词，但意思有啲唔同，上海话嘅"软脚蟹"常用来形容软弱无能，被人欺负的倒霉蛋；粤语嘅“软脚蟹”则比喻行唔快或不能走远路的人，也比喻没乜能力、遇事惊慌失措的人。 造句：遇到危险情况，唔好成只软脚蟹噉，淡定啲先会谂到办法嘎。 倒泻箩蟹 dou2 sé2 lo4 hai5 满满一箩筐嘅螃蟹倒翻在地，重获自由嘅蟹当然会四围逃散。要想将所有蟹捉番入嗰箩筐度，不但要左右走动去捉爬到冇雷公咁远嘅蟹，仲要防备佢哋用蟹钳攻击你，狼狈忙乱嘅程度可想而知。于是，“倒泻箩蟹”呢个俚语，就被用嚟比喻手忙脚乱的状态，或者场面十分混乱。 造句：煮煮下饭，厨房突然间爆水喉，今铺真係倒泻箩蟹噉，乱嗮龙。 大石矺死蟹 dai6 ség6 zag3 séi2 hai5 “大石矺死蟹”呢个词，据闻来自于清朝的一宗冤案。话说旧时有个人称“祝巡检”嘅官，在受理一单争地案时，将受贿银打成银蟹压在大石下，一来保留证据，二来係提醒自己要不遗余力地追查此案。呢宗被时间湮没的惨案，后来被编成粤剧《梁天来告御状》。小螃蟹被大石头矺到实，自然係动弹不得，只能乖乖听人指示、任人摆布。所以大家就用“大石矺死蟹”比喻嗰啲以权势压人、让人屈服嘅行为。 造句：主管又乱接项目，到实操嘅时候一镬粥咁，但大石矺死蟹，我哋点都要做完。
