麦子杰:靓声唱响广府文化

　　被誉为“声音贵族”嘅广州歌手麦子杰，将在2023年1月8日于珠江游轮珠水印象号上，举行具有岭南文化底蕴嘅音乐会。致力于推广大湾区文化嘅麦老师，希望用自己嘅歌声，将广府文化与旅游产业做结合，所以今次佢选择喺孕育咗广州人嘅珠江上开唱，在星空下唱响南粤声韵。

　　郭玮/文 陈祉伶、受访者提供/图

 

传承广东歌係音乐使命

　　

　　作为最早一批签约宝丽金唱片嘅内地歌手，麦子杰一直都觉得传承广东歌，係自己作为本土歌手嘅音乐使命。喺佢嘅音乐作品中，我哋可以感受到丰富多彩嘅广府文化元素：《源头》係讲佢细细个喺老西关长大嘅故事，《鹅潭荡舟》记低咗荔湾白鹅潭上的历史，《西厢记》中mix嘅粤曲，都係佢近期嘅心水之作……佢的歌声中，饱含佢对粤文化嘅坚守与信念。2019年，麦子杰喺一个花园中举行过一次户外音乐会，沉浸式嘅音乐体验令到歌迷意犹未尽，佢自己亦念念不忘。时隔3年，佢准备喺珠江水上，为大家送上全新版本嘅live show，用自己嘅歌声作为对新时代嘅礼物。

 

 

 

　　

无惧挑战keep住young

　　

　　坚持追求好音乐嘅麦子杰，觉得现场嘅live show，係自己同歌迷共享音乐时光嘅一场party。近年来，佢开始接触直播，更直接咁接收到歌迷们嘅反馈，佢亦都有咗更多嘅时间细心打磨自己嘅作品。麦子杰觉得呢个世界係公平嘅，虽然自己可能唔似年轻人咁有冲劲，但走过嘅岁月并不会白走，令依家嘅佢有足够的经验同信心，也好愿意同人分享，在面对新挑战时候，佢也可以抱enjoy嘅心态去面对。接下来，麦子杰计划喺自己嘅创作中，融入更多广府“非遗”、岭南文化嘅元素，希望更人都可以喺佢嘅音乐作品中，感受到生活嘅美好。

 

 

　　

Color采编幕后之ball场花臣多

　　今期Color采编幕后，可乐君带大家玩转花臣多多嘅“ball”！先去绿茵场上嚟番场热血沸腾嘅“世界波”；再整埋对独一无二嘅另类波鞋，型爆成条街；最后，仲有精心策划嘅美丽Ball场，包你大饱眼福！

　　郭玮/文 陈祉伶/图

　　大力神“水”

　　后生仔嘅想象力真係无限大！呢段时间，世界杯呢场体育盛事踢到全城沸腾，可乐君亦邀请到两位“足球小子”，加盟我哋嘅粤语课堂。1号球员一上场，就捧起个应景嘅足球，2号球员居然係举起咗个水樽？原来佢係想我哋嘅强大后期，帮佢P翻个“大力神杯”，识得揸道具借位，呢位哥哥仔转数真係够嗮快啦！

　　

 

　　自定义波鞋

　　潮流不被定义，最中意搞搞震嘅可乐君，就最擅长刷新潮流！冇嘅嘢我哋自己可以整，中意嘅配色当然要自己话事。今期DIY我们走环保路线，将鞋盒变翻做鞋仔，仲出动专业技过硬嘅美编小姐姐，为佢涂上颜色，最个性、至Color嘅波鞋就喺今期版面，期待成品嘅你快啲翻开内页！

　　

 

　　美丽“冻”人

　　前有电视剧《美丽战场》掀热话，后有TVB万千星辉颁奖礼举办在即，紧跟潮流嘅Color梗係要将呢啲热点全部玩齐！小伙伴们着番件礼服饮衫装起一身战斗格，摆个pose都呃得下人，奈何最近广州气温跳崖式骤降，靓靓模特要风度嘅同时，都偷偷储起少少温度，礼服搭牛仔裤波鞋，绝对係最“冻”人嘅ball场look啦。