|
|
|
回顾过去共同奋斗嘅一整年，除咗有各位小伙伴一直并肩作战，其实仲有好多“老拍档”——各种好玩嘅道具默默发光发热，为可乐报嘅报道增添咗唔少光彩。Color年度颁奖典礼，当然要为佢哋颁番个奖啦。 陈祉伶/文 Color团队/图 “最有星味”奖 代表选手：小小计算器、大大波板糖 今年，我哋不但以专访、活动合作等各种形式，结识到好多新鲜嘅艺人朋友，仲成功邀请到一啲朋友仔，从受访对象摇身一变成Color团队的“限定成员”，参与可乐报嘅内容创作啵。Color嘅老友朱主爱、胡鸿钧，都嚟参加过可乐报嘅经典栏目《粤语课堂》。拍摄期间，佢哋都“宠幸”咗唔少盏鬼道具噶。被小草捧住笃过嘅小小计算器，被鸿钧揸实当盾牌嘅大大波板糖，黐到嘅“星味”当然是最足嘅！ “时尚宠儿”奖 代表选手：型爆“绿超”、螃蟹头套 为咗令上版效果更好玩、更有视觉冲击力，令大家留下更深印象，我哋嘅模特经常要喺造型上落足心机噶，搞怪嘅道具就成为深受大家喜爱嘅时尚单品。好似呢副大大只嘅荧光绿蛤蟆眼镜，复古款式放到当下依然够时髦，oversize更添几分张扬、霸气，好多小伙伴都戴过嚟chok造型噶。新鲜入手嘅螃蟹型头套，在蟹肥味美嘅秋天首次亮相，虽然係为咗应时节嘅“季节限定造型”，不过因为自带瘦脸效果吸睛率百分百，加上十分唔错嘅保暖功能，已经升呢成目前最受欢迎嘅自拍神器。一于颁番个“时尚宠儿”奖俾佢哋先。 “技术含量max”奖 代表选手：手制真冰壶、可乐君Tufting 有密密关注Color嘅朋友仔，就会知道创意谂法多多嘅可乐君，仲有超强嘅动手能力噶。道具唔够用？不存在的，自己动手，丰衣足食！年初，“冬奥会”在中国举办，可乐报精心策划咗一次“冬奥”专题策划，为咗喺暖暖的南方玩到“真·冰壶”，Color团队亲手整咗几个小”冰壶”，玩起身都几过瘾噶。另外，为咗帮大家寻觅好玩有趣嘅手工技艺，Color仲经常探访手作达人，亲手制作咗唔少手工“作业”。呢个Tufting版Color名牌，就係集结Color团队之魂嘅杰作，真係技术含量max噶。 “宝藏遗珠”奖 当然啦，除咗以上获奖选手，仲有多位“老拍档”在激烈的奖项角逐中遗憾落败。好似充满大家儿时回忆、好适合用嚟扮chok嘅“祖传”小水枪；色彩缤纷艳丽、让人睇到都想咬一啖嘅仿真水果气球；逼真到似有味，但又深受各位小伙伴争相宠爱嘅“咸鱼君”公仔……Color都临时为佢哋加设番个“宝藏遗珠”奖！你仲记唔记得佢哋喺边期可乐报出现过咧？如果你可以一秒讲啱答案，咁“最忠实的粉丝”奖就一定非你莫属啦！
