|
|
|
《UP在湾区·港见粤闻》带住大家食咗几站传统美食，係时候喐喐手、动动脑，学番两手非遗手艺啦！今期可乐君同歌手胡芳芳一起玩“绣花功夫”，以针为笔、以线为墨，一针一线“绘”出靓靓图案，感受广绣作品在唔同角度、光线下，色彩随之变幻嘅魅力！ 郭玮/文 Color团队/图 传承千年好光荣 广绣，係中国四大名绣之一，通常係指广州、佛山、东莞、台山等地嘅刺绣工艺，即係以广州为中心嘅珠江三角洲一带民间刺绣工艺的总称。佢起源于唐代，到咗清朝嘅时候，就因为粤剧戏服制作嘅推广，而享誉国内、远销海外。2006年，广绣被列入第一批国家级非物质文化遗产名录中。广东省一级工艺美术大师陈少芳，就係传承广绣嘅代表人物，被誉为“广绣的光荣”。依家佢嘅仔仔谭展鹏同心抱黄敏健都成为咗呢项手艺嘅传承人啦，呢两位亦係今期教芳芳学手艺嘅“师父”。 绣花”功夫”要细心 传承人黄师傅话，第一次接触广绣嘅时候，就被一幅灵动嘅动金鱼广绣深深吸引住，上面嘅丝光颜色从唔同角度睇都会别有一番风采。如此内有乾坤嘅绣花“功夫”，原来係需要根据唔同线种，搭配唔同针法，刺绣出来嘅图案就会呈现出唔一样嘅形态。传统广绣用嘅底布，一般係用桑蚕丝制作嘅，触感比较细腻柔软，所以选用嘅针、丝线都需要十分幼细。制作时非常考验制作者嘅眼力，更加需要沉着嘅耐性与细心，再细微嘅偏差都可能导致最终成品呈现嘅效果不尽人意。因此制作者每一次落针，都需要精准定位，就好似传承人对广绣嘅热情一样，用工匠嘅精神精益求精。芳芳喺老师嘅指导下，都顺利完成咗自己嘅第一个广绣作品，虽然好花费时间，但收获到满满成就感。 与时俱进花样多 广绣最得人中意嘅特点，就係佢远望嘅时候颜色鲜艳饱满，构图醒目亮眼，细睇就会发现佢繁而不乱，细节精致。传统作品中图画嘅构思，创作素材好多时係源自生活，最多嘅係花鸟鱼虫，有时亦会选用镬耳屋、红棉等呢啲具有广府特色嘅事物。人工刺绣花费嘅人力、时间成本比较高，一般会用嚟制作供人鉴赏、收藏嘅高档艺术品。近年来，大众对又靓又传统嘅工艺越发中意同欣赏，为咗让广绣走进千家万户，现在也会用新研发嘅电脑机绣提高制作效率，呢种方式可以批量制作更具实用性嘅日用品，令大家更容易get到呢种靓靓工艺品。T恤、手袋等等潮流单品，都可以融入广绣元素，刺绣嘅工艺经过改良，又可以创作出更潮更新嘅图案……传统的艺术能够在不断创新中传承，未来亦会发展得越来越好。 Color提示：《UP在湾区·港见粤闻》会带大家学非遗、品美食、玩转非遗手艺，如果想知下次轮到边位大咖带大家搞搞新意思，记得关注我哋啦！
