吴业坤：出道十二年，仲想做偶像!

　　前段时间，“坤哥”吴业坤啱啱结束咗广州站音乐会，完成咗自己一部分嘅内地巡演计划。从初来乍到嘅人生路不熟，到依家爱上广州呢个城市，坤哥话自己有咗唔少新体会。而回顾返出道嘅十二年，坤哥又係点样成长为今时今日嘅偶像咧?跟住Color去睇睇吧。

　　郭玮/文 受访者提供/图

 

　　活力广州 惹人着迷

　　吴业坤话，以前除咗返乡下同短暂工作，都好少有机会喺内地逗留咁长时间。趁住今次巡回音乐会嘅契机，佢终于有机会在广州住一段时间，慢慢感受呢座城市嘅魅力：打卡东山口，潮店有意思，仲见到好多潮人；漫步花城广场，呢度唔止係地标，亦有人玩飞盘、有人跑步；走在街头，你会见到个性十足嘅后生仔女、步履匆匆嘅上班族……喺坤哥眼中，呢啲广州人嘅普通日常，都係广州充满活力嘅体现。坤哥觉得，佢首歌《一路》同广州嘅适配度极高，呢首歌就係唱年轻人为咗梦想，一路向前，“各人觅到各自发展”。

　　冇人可以抵挡广州嘅美食，坤哥都唔例外！佢被广州嘅美味一次又一次俘虏，无论几夜都可以揾到好嘢食，令佢觉得广州好有亲切感、住喺度唔会寂寞。当然啦，坤哥在诸多“美食诱惑”中，仲係保持身为艺人嘅自觉：“想食多啲好嘢，但开紧音乐会，唔可以太放肆。”

 

 

 

 

　老友埋堆 收获良多

　　除咗自己嘅音乐会，坤哥喺更早之前，仲以嘉宾身份分别出席咗好友吴若希、胡鸿钧嘅音乐会，为佢哋嘅演出助阵撑场。坤哥将呢啲舞台形容为“神奇嘅经历”，因为入行嘅时候，大家仲係默默无闻嘅新人，努力多年，今时今日大家都有咗fans、有欢呼同掌声，一切来之不易。年中嘅时候，坤哥拍埋一班friend北上拍《香港人在北京》，喺新剧中佢饰演听障吉他手，呢个角色对佢嚟讲，都几有挑战性，能得到大家认可，坤哥觉得係最值得开心嘅事。拍新剧嘅时候，坤哥嘅普通话水平都得到提升，仲收获咗好多前辈嘅提点，又同戴祖仪合作咗新歌，甚至连摄影技术都有咗进步，呢趟旅程嘅收获真系意外地多。仲有一个“小惊喜”就係，志同道合嘅一班friend埋堆住喺酒店两个月，居然有咗啲毕业旅行嘅feel添。

　　

 

 

 

　　要做榜样 一起进步

　　吴业坤专注于音乐事业发展嘅同时，参演过嘅影视作品都唔少噶，目前饰演过嘅角色都係偏正派嘅居多。坤哥话：只要係唔一样嘅人物，就会有好多唔同嘅玩法，每次都可以係一个新挑战。同Color君倾计嘅时候，吴业坤都有透露，目前最想尝试嘅题材，係拍下偶像剧嗰种恋爱戏码啵。以前佢会觉得唔好意思回看自己嘅旧作品，但依家大个仔，佢就认为，只有回顾过去，先可以改正不足、继续前行。佢曾经立志，万大事要“做自己”，但经历多咗，佢就意识到有时真係唔可以太任性；佢对自己都好有要求嘎，希望自己同中意佢嘅人一起进步，希望成为别人嘅榜样。出道十二年，佢依然想做个“偶像”，而佢对偶像嘅理解係：“唔一定靓仔或者好有才华，但可以带俾人正向嘅影响。”坤哥仲答应大家，一定会继续努力做多啲好作品出嚟，不如我哋一齐期待下啦。