儿童公园 释放童心

　　儿童公关原本係为0-12岁嘅小朋友建造嘅，Color君却意外发现佢对成年人一样好友好！番禺儿童公园係目前广州最大嘅区级儿童公园，童趣十足、色彩缤纷，又保留咗岭南水乡嘅自然风光。滑梯有十几款，旋转木马两层高，童话风大片即影即有，令你心情放松，能够放开怀抱，释放童心。

　　郭玮 /文、图　

 

　　pat pat盛宴

　　如果你中意瀡滑梯、荡千秋呢种非机动游戏，咁你一定会爱上这里。喺番禺儿童公园里面，有超过十款唔同嘅滑梯，供大家嘅pat pat享用，石米水泥钢筋款大滑梯依墙而建，光滑梯面够长，瀡得够过瘾；隧道款旋转梯颜色够sharp，梯身有半透明有机玻璃设计，滑落过程中仲可以睇睇风景；缤纷直梯就係要带你快、恨、准咁冲向目标，满足你对速度与激情嘅喜爱；有啲综合多功能嘅大型滑梯，仲兼具多款有挑战性嘅设施，包括攀爬网、铁索桥、吊环、钻山窿等，简直係俾机会你体验铁人五项嘅感觉。除咗俾你瀡到够皮嘅滑梯之外 ，园区内仲有各种千秋、跷跷板等童年老友记，刺激有趣，影相会好自然，唔使谂摆咩pose。顺便提醒各位大朋友，园区里面细路仔多，佢哋年纪细但玩心大，我哋游乐过程中要注意安全，撞亲自己或者小朋友就唔好啦。

 

 

 

 

　　梦幻自由

　　公园内嘅机动游戏就唔係好多 ，我哋一定要去双层旋转木马前打卡。这个海洋蓝底色的旋转木马，点缀各种趣怪海洋生物，双层设计梦幻十足，你可以选择定住转圈圈嘅海浪宝座，又可以坐识高低起伏的海豚、海马、八爪鱼“坐骑”，欢乐儿歌伴随一路，场景都好梦幻噶。去搭动物快车，“小飞象”“小肥狗”“马骝仔”车厢一架跟一架，喺轨道上带你游尽迷你版的高山低谷。快车车厢空间足够大，情侣、闺蜜一齐坐，坐密啲会好sweet。迷你摩天轮就最浪漫，虽然只有5个车厢 ，但颜色够靓，做背景打卡够醒目。机动游戏需要单独收费，而且係大人细路同价，有时仲可能因为机件维护而暂停开放，有心去打卡嘅朋友就要注意院内公告啦。

 

 

 

　　出片圣地　　

　　如果你想拍啲靓相，你可以去人工湖水车前摆拍、迷你吊桥上拗造型、假山旁边扮悠闲。园区内嘅自然景观都好唔错，唔少人仲安排一家人嚟扎帐篷露营，树荫下乘凉、共享天伦。公园里面有好多水果造型嘅屋仔，最啱影童话风大片，虽然屋仔经过日晒雨淋略显陈旧，但只要加翻少少滤镜调色，爱丽丝梦游仙境咁靓嘅相片，你都可以拥有。因为主打童话梦幻feel，大家可以穿上色彩饱和度高啲嘅造型嚟摆拍 ，影张减龄靓相过“六一”。　　

 

 

 

　　享受呵护

　　儿童公园内的设施，都係为小朋友量身定做的，七彩配色随处可见，拍照出彩之余，令人睇到都好舒心。园区的围墙特别彩绘成小火车造型，随处可见嘅甲虫造型植物说明牌，手绘壁画展示历史典故、民间传说等，童趣味拉满。每个沙池旁边特别安设嘅水龙头，唔使惊玩到污遭邋遢，水龙头嘅高矮係按小朋友的身高设计，水流细细唔容易整湿身，同小朋友一起洗手洗脚的时候，真係好有返到幼儿园的感觉！