细个嘅hero梦续费了！

　　每个人细细个就开始有英雄梦，睇动画大片嘅时候，成日都幻想自己能量满满。最近唔少大家童年嘅经典英雄形象电影，都被引进或者重拍，齐天大圣、闪电侠、蜘蛛侠拍埋新晋偶像“水火不容”CP连翻出击，究竟边个係你嘅dream 咧！

　　郭玮/文  官方海报、剧照/图

　　经典再翻挞

　　《西游记》係中国小朋友最熟悉不过嘅IP，陪伴咗唔知几代人长大，细个可以睇动画，大个咗就关注真人版影视作品，各种新编新创睇到不亦乐乎。大家等等等都等不到周星驰嘅《美人鱼2》，却惊喜等来咗由佢监制嘅《美猴王》动画电影。故事延续经典嘅马骝仔大战妖魔鬼怪剧情，期间佢仲认清自己，成为励志嘅榜样。新版马骝形象被唔少人吐槽，但当网友翻出星爷喺《大话西游之大圣娶亲》中嘅look出嚟做比较，发现又有奇妙嘅相似之处。经典IP值得翻挞再翻挞，加上有星爷出手，个中嘅惊喜真係要睇过先知。

 

 

 

 

　　英雄玩联盟

　　《闪电侠》可能係好多男仔嘅偶像，电影版确认引进之后受到大家高度关注。集动作、科幻与冒险于一身嘅经典IP，讲述嘅係闪电侠回到平衡宇宙拯救母亲嘅故事，当遇到麻烦事的时候，女超人、蜘蛛侠等同样爱好正义嘅英雄朋友仔，就梗係两肋插刀出来帮拖啦。典型嘅英雄联盟打怪兽啲情节虽然有少少套路，但欧美电影特效制作永远唔会令人失望，斋睇电影嘅效果都应该可以值回票价。虽然冒险类剧情看似热血激烈，但睇过提前试片嘅朋友都话，见到闪电侠与时空赛跑嘅场景，依然会被温馨的感觉融化，最经典嘅画面就係平行时空中，蜘蛛侠、女超人、闪电侠两两相遇，热血不失温情。

 

 

 

　　水火新交融

　　继《疯狂动物城》后，迪士尼又再疯狂，推出以水、火、土、气四大元素为主角的《疯狂元素城》。动画中构建咗一个各种元素和谐共处嘅新式世界，而电影中“城市”的构建则细腻到每个角色身上：秃头土元素大叔被水先生嘅喷嚏溅到，就会瞬间头草萌生，水少女有浴缸专座，但刹车躲避不及就会令物品溶于水中，气元素阿姨轻盈，轻松就可以飘在半空……各种元素原本各有各精彩，偏偏热情嘅火就遇上柔情的水，原本水火不容点知两者坠入爱河。两位元素为爱可以去到几尽，后面火会被水淋熄，定係水被火把烤干，为情变英雄互相救赎，定係自身难保要各自飞，听讲剧情搞笑又sweet，值得一起去疯狂一下哦。

 

 

 

　　Chok爆盘丝洞

　　凡人被蜘蛛咬完变英雄嘅故事，令小朋友的童年不再害怕昆虫，但蜘蛛吐丝飞檐走壁嘅故事已经显得老土。而《蜘蛛侠·纵横宇宙》就颠覆传统，召集一大班“蜘蛛精”埋堆玩群P，蜘蛛侠2099、蜘蛛女、印度蜘蛛侠、朋克蜘蛛侠等等，大蛛小蛛落玉盘嘅空前阵容，各种身怀绝技的新晋蜘蛛精悉数登场，玩转多元宇宙平衡空间嘅冒险大行动。作为一部动画电影，片中运用咗好多时下潮人中意嘅街头涂鸦、摇滚等元素，同传统嘅超级英雄设定相比更有赛博朋克味，斋睇预告都觉得佢係个全新概念嘅“盘丝洞”。