百变“班马” 一定要你记住！

　　

　　今年年初，可乐生活融媒体直播间（班马）启用，咪以为佢just用嚟做访谈咁简单，整嘢食、做手工、打功夫、玩游戏……喺好奇心重、玩性大嘅Color团队推动下，“班马”呢一年百变到飞起，好玩嘅、好吃嘅、好听嘅，都要带住艺人friend一齐疯狂试探，势要令来过“班马”打卡嘅艺人朋友都记忆深刻！

　　

　　郭玮/文  Color团队/图

　　新kitchen出“厨神”

　　

　　美食总会令人心情愉悦，而作为湾区潮流风向标嘅Color，点会简简单单食下嘢就算，梗係要自己喐手整嘢食啦！一部烤箱，搭配一颗天马行空、勇敢的心，“班马”升呢变“Color厨房”。同“最佳女配角”一起整面包，虽然出品唔係最松软嘅，但外脆内韧有惊喜；约“新城劲爆新人王”焗曲奇，造型一般但爱意满载，越品越sweet，唔怕你哋甜到漏；“弹钢琴的靓仔”来整应节月饼，手法唔係正宗传统工艺，但心意满泻、个性塑形，已经赢咗；“废墟里行出”嘅女歌手，明明做的係醒狮馒头，出炉变身卡通猫……“Color厨房”次次试新嘢，力求每次成品都出其不意，令个个艺人friend都玩到唔舍得走，深深记住咗“班马”呢个咁好玩嘅地方。

 

 

 

 

　　

　　人人都变大细路

　　

　　除咗食潮嘢，“班马”仲会同大家做啲整古整怪的手工！约音乐人玩橡皮泥，结果可乐君捻出嚟嘅成品被对方睇中带走；“视后”嚟到，梗係叫佢show下“绣花功夫”，估唔到佢第一个“绣品”，就令大家惊艳。唔玩手工，呢度仲可以“打功夫”，可乐君随时变身、配合各位主角做“工具人”：强壮大只的可以将佢拎起舞嚟舞去，size细细粒的一样可以将佢孭起，仲有双人出马嘅朋友，将可乐君“左右夹击”，玩到癫。“班马”成日传出欢声笑语，变成潮人都冧嘅happy land。来过“班马”打卡嘅艺人friend，都会带走一份大细路嘅美好记忆，仲念念不忘，话下次要再嚟。

 

 

 

 

　 　　玩法多多冇套路

　　

　　“班马”以及Color团队仲有好多拿手嘢，会同艺人们date。讲访谈（攞料），有态度又有深度，经常唔觉意就探出鲜为人知嘅密料。讲音乐，“班马”准备咗一千种玩法：直播busking，歌手现场live唱原创；估歌仔、抢住唱，人人都唔认输；吉他MIX二胡嘅乐器组合，呢个搭配真係唔多见。讲玩游戏，特色小剧场、劲爆冷笑话、经典剧还原……简直就係大镬蒸餸，样样都熟啊！讲出片，剧情、造型冇得弹，加上专业灯光氛围、架势音响设备、多才多艺嘅团队阵容，“班马”会用独特嘅方式，记录每位艺人friend美丽嘅足迹。睇下“班马”留言板满屏嘅亲笔签名，就知道几架势啦！