翻工除咗可以实现自己嘅人生价值，仲可以收获好多欢乐！有上司赞你叻叻猪，仲有同事万岁，努力一年收到花红，就可以他条叹世界啦！音乐才子邓智伟同我哋一齐玩转打工人口头禅，做个爱翻工嘅打工人啦。
郭玮/文 秦丽莹/图 邓智伟、郭玮/模特
饮胜 jam2 sing3
饮胜，相当于cheers，即係干杯嘅意思。相传古代朝廷禁酒，因此大家会用规避措辞嚟应对。“胜”原来係“圣”字，係装载酒嘅器皿，可以指代酒，所以饮酒就可以用“饮胜”代替；再者因为做生意嘅人以水为财，最忌就係“干”噶啦 ，当生意成功举杯庆祝的时候，嗌饮胜就更好意头啦。
造句：你首新歌一上线就霸屏热搜，呢餐饭一定要饮胜庆祝下！
劲揪 ging6 zau1
呢个词一开始係用嚟形容一个人功夫了得嘅，“劲”有强劲嘅意思，“揪”就有打交嘅意思 ，有时仲会用“好揪得”嚟形容一个人好好打。后来呢个词唔再局限于拳脚功夫，引申为厉害、了不起等意思，可以用来赞美人或者事情。
造句：呢个新人又写得稿，又出得镜，连片都可以自己剪埋，真係够嗮劲揪。
掂当 dim6 dong3
喺粤语中，掂当嘅意思为好妥当 、冇问题。“掂”本身就有竖直嘅意思，又有“通达”嘅意味，“掂过碌蔗”就用来比喻事情好顺利，简直完美嘅状态。“掂当”一词就延伸出顺利、成功、办妥当、赞扬等意思啦。
造句：呢份计划书超掂当，老细都忍唔住畀个good你。
叹世界 taan3 sai3 gaai3
“叹世界”有美好嘅意境。“叹”喺呢度本字为“儃”，表示从容、悠闲的样子。“世界”除咗字面上的意思，仲包含咗生活、人生、未来。叹世界就係话享受人生、enjoy当下生活、期待未来咁解。广东话有句俗语“火烧旗杆—长碳（叹）”，就係指永远无忧无虑生活，仲可以表示美满的退休生活。
造句：你提高工作效率，快快手完成啲任务，剩低嘅时间咪可以慢慢叹世界啰。
万岁 maan6 seoi3
咪以为只有对住皇上先会讲“万岁”，以前啲香港苦力工人休息时，都中意聚喺工棚或者工地附近嘅小茶馆饮茶，茶馆嘅老细就习惯对佢哋讲“万岁”，表示无数次添茶嘅意思。“万岁”逐渐演变成邀请客人饮茶嘅用语，后来更扩展为热情好客、笼络人心嘅意思 。
造句：智伟哥知道大家好落力帮佢推新歌，所以今日下午茶佢万岁哦！
花红 faa1 hung4
中国传统中红色经常同喜庆关联 ，旧时同好事相关、簪喺头冠上嘅鲜花、披喺身上的红绸、婚姻有关嘅喜庆礼物等等，都会被叫做花红嘅。到咗现代，公司盈利，员工奖金丰厚，都算係可喜可贺嘅红事，所以花红就指代年终奖金，更有美好嘅寓意在其中。
造句：今年份花红好沓水，大家嘅努力最终都会有回报。
