秋高气爽，上马！

　　想在马背上欣赏秋色，现在在城中就可以实现。最近，喺广州城中开咗一家英式马术俱乐部，趁住秋高气爽，我哋话走就走，去到充满松弛感嘅马场，同马仔培养感情，学骑马嘅技巧，感受马术运动嘅魅力！

　　

　　黄译萱/文   黄译萱、受访者提供/图   郭玮/模特

 

　　秋天骑马正当时

　　

　　走进马场，美拉德配色嘅场地充满秋意。首先映入眼帘嘅就係一字排开嘅深棕色马房，整洁又温馨嘅隔间係马仔的起居室。教练们攞住刷马工具认真照顾马仔，每匹马嘅日常护理都有一位专属教练负责。旁边嘅土黄色训练场铺住马术赛事标准嘅纤维沙，踩上去软腍腍、好舒服，马儿喺场地中跑跳都好惬意。旁边嘅户外障碍场地更有竞技氛围，置身其中，你嘅脑海就会浮现出骑手骑住骏马，跃过栏杆嘅刺激场景。秋天呢个季节，简直就係为骑马活动量身定做嘅。教练Bryant话：“马仔最舒适嘅温度係25°C左右，所以凉爽嘅秋天最啱同马仔去喐动下。”趁住天气微凉，我哋坐上马背，穿梭于凉爽秋风之中，人同马都好享受！

 

 

 

 

　　醒目马仔同你friend

　　

　　学习马术嘅第一课，原来要去马房上。马术係唯一一个需要人同动物配合的运动项目，想要骑好马，最紧要嘅就係要同马仔有默契。所以，教练Bryant先带我哋去马房，同马仔培养感情。Bryant介绍话，马仔係有灵性嘅动物，每匹马都有自己嘅性格和喜好。同马仔初接触，人同马都会先保持距离，你可以主动啲先请马仔食小零食——胡萝卜，马仔会好斯文咁用嘴唇卷走零食，你再顺手轻轻摸下佢嘅鬃毛，人同马之间就会慢慢熟悉起身。如果想马仔同你“有默契”，梗係要花啲时间和心思，精心喂养、仔细刷洗、细心护蹄，每日去陪佢散散步，同马仔成为亲密无间嘅朋友、氹佢同你玩。可见，马术冇得速成，因为你要先取得马仔对你嘅信任。

 

 

　　马上chok样有讲究

　　

　　着上马靴、护甲，戴上手套、头盔，着上骑士装后，可乐君发现自己原来可以咁有型！听Bryant介绍，骑手嘅装扮既靓仔又实用，例如马裤内侧有硅胶，能够帮你喺马背上更好咁用腿“抱”住马；头盔好实净，喺不小心坠马时可以保护骑手嘅头部……教练对住成墙装备如数家珍。之所以马术装备咁多，係因为马术赛事中有严谨嘅着装要求，连骑士着装嘅颜色都有规定。可乐君发现，马房门口有间摆满装备嘅房仔，原来唔止骑手要搭好look，备马时都要帮马仔备上汗垫、平衡垫、马鞍等。

 

 

 

 

　　

　　架势骑马係挑战

　　

　　可乐君第一次上马，先踩住马凳爬上马背，坐稳后，教练提醒我哋保持正确嘅骑姿。因为马仔好敏感，你有犹豫、害怕嘅情绪，佢都会feel到，所以你要昂首挺胸、目视远方，畀马仔感受到你嘅信心。第二步学控马，你要顺住马仔嘅习性同佢讲，发出口令让马仔开始跑动，用温柔嘅“and halt”声安抚马仔，令佢慢慢停低。虽然听落几简单，但初初开始未掌握好讲指令嘅语气时，都要靠教练帮手叫喐只马。体验过骑马嘅可乐君发现，马术确实係一项对体力和脑力的双重考验。骑马过程中，必须协调腰部、胯部以及腿部嘅核心肌肉，以便更好地配合马匹嘅运动。同马仔磨合过程中，你会慢慢克服畏惧情绪，增强自信，沉醉于这项令人充满热忱嘅运动。

　　

 

 

 

 

 

　　特别鸣谢：广州星骑马术俱乐部（黄埔区科学大道40号）