开饭啦！花式快餐新体验

　　现代潮人对食嘅要求越来越高，要迎合工作快节奏，又要enjoy嘅三餐，便利店、快餐店就成咗打工人嘅首选“饭堂”。今期Color君选咗最近升呢嘅三间“饭堂”，助力打工人三餐都要快、靓、正。够钟开饭啦，ready go！

　　

　　郭玮/文  黄译萱/图  郭玮/模特

　　

 

　　早餐“扬手即停”

　　广州首家报刊亭M记正式营业，佢体型虽小，但功能多多，内部空间能够容纳咖啡机、雪糕机等等营业标配仪器，而且同常规嘅M记相比，小报刊亭M记喺早上10点30分之前，仲可以买到早餐添。因为佢正好位于交通繁忙嘅十字路口且毗邻大商场，人流量不容小觑，早高峰等过马路嘅小憩‌时间，就可以快速入手一份新鲜滚热辣嘅早餐，对各位争分夺秒嘅打工人嚟讲，简直就似路边扬手即停嘅的士咁方便；周末大家路过，可以买杯热咖啡润喉，或者食个冰冻甜筒降温，即刻插满电继续逛街。报刊亭快餐店最特别嘅地方，就係佢保留咗报刊亭最原始嘅书报杂志销售功能，当季漫画就喺报亭侧边展示，感兴趣嘅客人只需要扫码就可以自行落单购买。

 

 

 

 

　　午饭“pro fashion”

　　午餐係慰劳自己早上嘅勤劳，更係开启下午积极状态嘅动力。想食豪啲就怕肥腻上火，时间唔够又想速战速决，“绿化”变pro嘅KFC成为打工人新宠。KFC PRO主打低脂健康简餐，店内餐食种类繁多，设计搭配特别，又能全方位实现健康低脂嘅配餐理念。佢将传统嘅炸鸡改成慢热烤熟嘅鸡肉，酥炸薯条用新鲜嘅蔬果代替，汽水冷饮亦以果汁酸奶补上，就连之前嘅汉堡面包都变成麦皮蔬菜卷……每份餐食有齐所需营养元素，科学配比嘅份量够饱又唔会滞，真係超级pro嘅健康餐。虽然都係偏冷食嘅快餐，但同相对清寡嘅“白人饭”相比，pro版嘅健康餐会多返一啲调味，年轻人亦更愿意接受呢类偏洋味嘅快餐。

 

 

 　　烤鸡腿肉蔬菜谷物能量碗

 　　羽衣甘蓝牛油果酸奶昔

　　晚宴24小时on call

　　打工人最怕落班时间有“惊喜”，一个OT分分钟miss最佳开饭时间。不过唔使担心，24小时营业嘅便利店会随时随地恭候你。Seven-eleven便利店为打工人开设嘅“7仔小食堂”，将便利店嘅冷冻快餐，改成现煮现烤嘅热食，食客点餐后，厨房再制作餐食，新鲜滚热辣咁送到你嘅手中。同冷藏又翻叮嘅快餐相比，小食堂嘅套餐里面米饭更香软，趁热淋上酱汁，即食嘅猪扒外脆内嫩，无论配冻汽水定係热饮品，都别有一番风味。除咗各种饭餐之外，小食堂内仲有多种配料夹心嘅包点可选，可颂牛角包夹肠仔，照烧鸡扒汉堡，一出炉就送到到食客手上，等食客及时享受到“第一啖”嘅美味。“小食堂”保留咗便利店内各种零食、小食同饮品，增设用餐区域，餐台上配有各式调料，每位食客喺enjoy最适合自己口味嘅餐食时，可以令自己take a break啦。

 

 

 

 　　德式香肠可颂堡