赛博新春 Show出个性

　　新春之际，钟意打机嘅朋友仔，会为屏幕入面嘅自己换一套有年味又够fit嘅全新时装。过年嘛，梗係要从头set到落脚，由随身道具、专属武器，到大场景式年夜饭，各大游戏厂商喺每个细节落足心机打磨，费尽心思讨好各位玩家，等游戏里嘅“崽崽”们都可以着得红红火火过肥年。

　　

　　

　　CALL你着电子靓衫

　　

　　讲起新春靓衫，自然以喜庆嘅红色调为主，红白色调喺游戏厂商嘅巧思配搭下，玩出唔少新花臣。古风派嘅《天涯明月刀》手游，推出新春同新赛季外观——“炽翎焚云”，朱雀与火焰碰撞，大面积白色衬点缀红，尽显高岭之花气质。《逆水寒》手游都唔执输，推出新中式“灯花春禧”时装，寓意吉祥如意常伴，蓬蓬裙款式够晒吸睛。《英雄联盟》入面冷酷嘅刀锋“卡蜜尔”，换上“踏雪寻梅”系列皮肤后，镜头前都添咗几分柔情。《第五人格》同旺仔联名，为“古董商”打造新春皮肤“玉糖春”，娇俏可爱嘅模样着实迷人。

　　《逆水寒》手游　　《天涯明月刀》手游　　《第五人格》和旺仔联动时装　　《英雄联盟》

　　

　　武器加上新春BUFF

　　

　　《永劫无间》手游今年推出嘅新春限定武器外观，款款有特色，有结合寒冰与梅花元素嘅长剑，亦有年味十足嘅限定款式——用年鱼同糖画元素打造嘅双戟，咁得意嘅武器，点舍得拎去打人啊！《燕云十六声》联动《赋神》，带来全新手甲武器外观“飞鹏抟空”，半透明水波纹流转其间，周围仲有细锦鲤凌空跃动，设计得十分灵动。《QQ飞车》就一口气推出多款机甲、联赛车皮肤，你想要嘅款通通齐全，驾住新车喺赛道上狂飘，够晒过瘾。

　

　　《燕云十六声》和《赋神》联动武器外观　　《永劫无间》手游　　《QQ飞车》

　

　　上线齐齐年夜饭

　　

　　食完屋企嘅豪华年夜饭，记得上线再做一次“大胃王”，同班网友齐齐聚埋食团圆饭。《忘川风华录》手游推出“忘川团圆饭”活动，喺限定新春场景入面尽情玩耍，帮萌物小猫准备晚餐，做完任务仲可以凑埋打“川麻”，每个角色都有专属技能“出猫”变牌，超识玩！《和平精英》就新增敦煌主题地图，等大家一边“吃鸡”，一边同队友坐低叹“和平年夜饭”，花式打机贺新春。到咗马年，点可以冇啲马年专属道具？《和平精英》推出敦煌配色嘅马头造型道具“天马口哨”，一吹就可以将马匹变做天马，原地起飞，好玩又好用！

　　《忘川风华录》　　《忘川风华录》年夜饭　　《和平精英》年夜饭

　　《和平精英》道具　　《和平精英》