“大湾鸡”萌动新春

　　

　　新春“顶流”提前锁定靓爆镜嘅“大湾鸡”，快啲跟住可乐君来捉“鸡”啦！广州杂技团接手“大湾鸡”皮套登场，十八般武艺傍身，抢镜招数全面升呢，仲被大家亲切昵称为“鸡杂团”。临近新年，佢哋全“鸡”团体出击，带住大家打卡大湾区靓景，仲精心排练咗杂技童话剧，陪街坊齐齐过大年！　　

　　

　　“鸡杂团”招数升呢

　　

　　可乐君特意拣咗个周末，约埋“大湾鸡”喺海心沙讨教抢镜绝招，一见面就被佢哋嘅招式惊艳到！喜洋洋仰天大笑够得戚、飞天跳跃超轻盈，乐融融软骨下腰好犀利，每个动作都萌爆全场，引来阵阵欢呼。自从广州杂技团新苗班嘅后生仔女接手“大湾鸡”皮套，呢班年轻人就将十八般武艺融入演绎，让每一只“大湾鸡”都有专属特色，助力“大湾鸡”持续出圈。而家“大湾鸡”喺网友眼中有咗特别嘅“花名册”：跳芭蕾嘅“芭蕾鸡”、打功夫嘅“叶问鸡”、凭可爱身材走红嘅“黄金比例鸡”、因坐烂凳仔出圈嘅“闯祸鸡”……一举一动、一颦一笑都圈粉无数。杂技团嘅“内胆”们更将独门功架融入表演，大家可以睇到喺排练花絮入面，蹬人、顶碗、抖杠等杂技绝招轮番上阵，将传统杂技变得萌趣又生动。未来佢哋仲会玩出咩新花臣？大家都好期待！

　　

　　“大湾鸡”靓出广东

　　

　　从年初开始，“大湾鸡”就忙到飞起，成咗名副其实嘅“走地鸡”，不时闪现喺大湾区各个角落，粉丝们都趁住佢哋出巡，争相捕捉、偶遇呢班大湾区“顶流”。元旦期间，佢哋更是奔赴多地、四围宠粉：现身白云山摩星岭陪大家迎接新年第一缕阳光，闪现周深香港演唱会陪歌迷跨年，又赶去粤港澳大湾区女子半程马拉松赛道为选手加油打气……无论係广州塔顶，定係珠江游船，都随时可能偶遇憨态可掬嘅“大湾鸡”。佢哋从全运会嘅“销冠”，变身大湾区靓景推荐官，四围遛弯嘅身影成咗广州最鲜活嘅文化名片。而荣升“城市推广大使”嘅“大湾鸡”，仲频频出差：打卡哈尔滨冰雪大世界、逛呼和浩特老街、现身贵州“村超”赛场，每次现身都收获大批粉丝，萌趣形象打破地域界限，将湾区文化同城市精神传遍全国！

　　

　　“杂技鸡”萌动童话

　　

　　新春期间，“大湾鸡”会为羊城街坊送上重磅贺岁大礼！杂技童话剧《萌动奇迹》将在新春期间登陆广州大剧院。喺呢个童心爆棚嘅原创童话故事入面，“大湾鸡”化身主角惊喜登场，舞台之上，天真勇敢嘅喜洋洋同乐融融真正“活”起来，通过跳跃、翻腾、现场互动等精彩表演，带大家勇闯被封印、色彩尽失嘅童话世界，以纯净童心同无畏勇气突破黑暗，重启美丽童话。编剧王溱老师表示，希望每个来看剧嘅朋友，都能揾返属于自己嘅童心。春节本就係辞旧迎新嘅时节，不妨同家人好友一齐走进剧场，喺童话世界入面找回内心嘅纯净与活力，以崭新嘅勇气迎接新一年嘅挑战！