粤语“奥斯卡”你真係好叻啊

　　我哋嘅“老best”涂毓麟Oscar，过去嘅一年除咗开show之外，仲有唔少影视作品，Color君都忍唔住赞佢一句：你真係好叻！新一年开启了，Oscar话要将啲好运气同大家一齐share，教大家叻叻讲粤语，齐齐领取人生“奥斯卡”。

　　

　　郭玮/文   秦丽莹/图

　　涂毓麟、郭玮/模特

　　

　　沙尘  saa1 can4

　　相传以前广州西关有个商人“陈沙”，卖洋货发达，成日中意坐轿出街炫耀威风。有一日突然刮起大风，轿夫企唔稳，搞到陈沙差啲跌落轿，风吹沙走令佢好狼狈，路人就嘲笑佢“陈沙变沙陈”。后人就用“沙尘”嚟形容人骄傲轻浮、爱炫耀嘅模样。时移世易，而家呢个词逐渐变成中性词，可以形容人有本事、有能力。

　　造句：大家睇佢企喺台上个样几沙尘，攞咗奖真係唔同啲。

　　

　　架势  gaa2 sau2

　　呢个词原本用于形容人或事物好有排场、十分气派或令人瞩目，依家仲延伸出形容个人能力成就好突出嘅意思，亦可以形容身价、名气、地位和气势。早前Color参加广州大型咖啡节“咖势”，就係利用谐音梗——粤语中“咖啡”嘅“咖”同“架”同音，形容呢次咖啡节有气势、排场大，可乐君有幸参加，真係学到好多嘢。

　　造句：见到咁架势嘅应援，就知道呢场show嘅主角几受欢迎、人气几高啦。

　　

　　犀飞利  sai1 fei1 lei6

　　呢个词係厉害、了不起嘅意思，日常更写作“犀利”。原来呢个词出自一个外国钢笔品牌Sheaffer，佢係世界三大名笔之一，仲係联合国指定签名笔！喺上个世纪40年代，广东、香港用得起呢个牌子钢笔嘅人非富则贵，当年如果见到有人衣襟插住一支咁嘅钢笔，大家都会感叹一句：“犀飞利！”

　　造句：Oscar真係犀飞利，音乐会一开票就卖爆。

　　

　　

　　巴闭  baa1 bai1

　　呢个词用于形容人能力高、有本事，以前会略带贬义。相传呢个词原本係中东至印度半岛嘅人讲“bapre”嘅音译，喺宋、元时期仲演变出“巴臂”“巴鼻”“巴贝”“把背”等唔同写法和发音。而家嘅人就会用“巴闭”，形容人显赫、光彩、成就辉煌，有“很厉害”的意思。

　　造句：阿麟年纪轻轻就上过知名杂志做封面人物，真係好巴闭！

　　

　　晒命  saai3 meng6

　　“晒”喺粤语中有炫耀、展示等意思，“命”係人生、命运，或者指生活状态。“晒命”即係向人炫耀自己嘅背景、处境、幸运等，亦可以係彰显自己的实力雄厚、条件优越。如果係炫耀自己嘅甜蜜爱情，可以叫“晒恩爱”，旁人见到通常会幽默回应：“好晒！”表示自己被甜到，带少少羡慕妒忌嘅感觉。

　　造句：知道你女朋友好靓女，唔好成日喺我哋面前晒命啦。

　　

　　牙擦擦  ngaa4 caat3 caat3

　　旧阵时有间叫 “苏记” 嘅杂货铺，专门卖鬃毛牙刷同 “脷刮”，老板好有生意头脑，将三件套成套售卖，仲设计咗朗朗上口嘅宣传口号：“牙擦擦，脷刮刮，财路全凭口齿开发！”。呢句广告词传开之后，“牙擦擦” 就被用来形容人说话骄傲自负，亦含自信得意的语境义。“牙擦”为“齒截”（粤音 caat3）简化，叠词“牙擦擦”强化语气。

　　造句：小涂帮公司倾成单大生意，依家行出路都牙擦擦咁，自带威风。