![]() |
|
![]() |
|
![]() |
|
![]() |
|
![]() |
|
![]() |
|
![]() |
|
玩水要尽兴,话水有讲究!大概因为身处岭南水乡,广东人对水真係情有独钟,日常对话中更係时时将“水”字挂在嘴边,尤其钟意“以水为财”:有钱叫沓水、俾钱叫磅水、筹钱叫扑水……但有时“水”又未必係好嘢啵,唔搞清楚呢啲“水”係乜水,小心迟早被人水啊! 陈祉伶/文、图 郭玮、黄芷晴/模特 威水wei1 sêu2 “威水”通常用于赞赏他人了不起、好厉害,即係“威风”嘅意思。点解讲“水”唔讲“风”?因为粤语中“风”和“空”音近,而“空”与“凶”同音,广东人钟意讲好意头,好多时候就用比较吉利 嘅“水”代替“风”,好似通风(报信)亦会讲成“通水”。而喺《广州话方言词典》中,“威水”仲可以形容物品鲜艳、醒目,或者某人因穿着合身而美观,显得精神饱满。 造句:呢个妹妹好威水,14岁就攞奥运金牌。 水兵对水手sêu2 bing1 dêu3 sêu2 seo2 虽然广东人成日都话“水为财”,但绝对唔钟意被人话“好水”噶。因为喺粤语里面,水作形容词时,一般係用于表示水平低、质量差。所以“水兵对水手”呢句俗语,就係话竞争的双方实力都不怎么样,即“菜鸡互啄”。有时都可以形容共事的两方程度差不多,一样咁差。 造句 呢场波简直係水兵对水手,冇乜睇头咯。 豉油捞饭,整色整水xi6 yeo4 lou1 fan6,jing2 xig1 jing2 sêu2 “豉油捞饭”係几好味,但用嚟形容你嘅为人,就唔多掂水啦。原本淡而无味、单调乏味的白饭,加入豉油拌匀,便有咗几分鲜味和色水。虽然望落好似色香味俱全咁,但白饭终究仲係白饭,所以“豉油捞饭,整色整水”,通常係形容人装模作样,搞门面功夫,造成假象,实质係为蒙骗别人。 造句 产品包装靓,但质量唔掂,咪就係豉油捞饭,整色整水,唔长久嘎! 冻过水dung3 guo3 sêu2 如果想讲成绩唔合格,广东人会用到“肥佬”呢个词,佢来源于英文“fail”,指失败、唔合格。但如果想形容其他情况唔多乐观,甚至可能无嗮希望,即将迎来失败,咁我哋多数就会讲“冻过水”,等于普通话所讲嘅“凉凉了”。仲有个比较相似嘅俚语叫“水咁冻”,则係形容希望甚微或人失望时的心情。 造句: 我部电脑入咗水啊,咁我啲资料咪全部冻过水? 食水xig6 sêu2 食水等于饮水?咁你就谂得太简单啦!食水,本身其实係形容船身入水的深度,旧时商船的船身“食水(位)”越深,便意味着装货越重从而可卖得更高的价钱。粤语文化中,“水”为钱财,“食”有赚取之意,所以在广东人口中,“食水”亦用嚟比喻从经手的钱款中公开或不公开地吞没一部分。 造句 呢单生意,你食水咁深,以后可能同你冇交易了。 叠埋心水dib6 mai4 sem1 sêu2 “心水”係一个好常用嘅粤语口语,佢可以表示喜欢、偏爱,亦可以解释为心思。好似“心水清”,就指有头脑、头脑清醒。叠埋指集中、收拢,把心思集中起来,就表示专心致志的状态啦。另外,“叠埋心水”都有“下定决心”嘅意思噶。 造句: 期末考试就杀到,我真係要叠埋心水温书啦。