食早餐啦！随便来个“九大簋”

　　

　　每天起床，你可能都会遇到呢个“人生难题”：瞓多阵好，定係起身食早餐好？一日之计在于晨，丰富营养或啱你心水嘅早餐，可以唤醒你一整天嘅精神气，谂嘢、做嘢都爽手啲！现在市面上推出咗各种各样早餐神器，你只需要投入食材、稍等片刻，开盖就即刻可以开启美好的一天啦！

　　

　　郭玮/文 品牌官网/图

 

　　

　　独沽一味餸

　　每个人嘅饮食习惯都唔同，有人就特别钟情一味餸。面包、三明治係最简单快捷嘅日常早餐，松软多士加上火腿、蔬菜，营养均衡又美味。唔少联名款嘅三明治机喺烤盘上压出公仔IP，令烤出嚟嘅多士面可可爱爱，一早送你靓心情。唔惯食多士嘅朋友可以试下蛋卷机，佢体积细但能力强，只要将蛋液调好味注入杯体，几分钟后就得到一份热辣辣的蛋卷。将唔同嘅材料混合蛋液，仲可以get到唔同口味嘅成品。“小米”嘅双管蛋卷机可以一次做两支蛋卷，节能又快捷。你唔中意食蛋黄？“生活元素”嘅煮蛋器特别增加咗一个“转蛋器”，启动转蛋功能后，可以用离心力将蛋黄打碎与蛋白融合，煮出Q弹美味黄金蛋，仲能够保持鸡蛋嘅全部营养成分添。

 

 　小米 双头蛋卷机

 　生活元素 蒸蛋器

 　kakao 印花烤盘铁板

　　早餐多面手

　　小朋友先做选择，大人梗係全都要！后生仔女中意一次过食多款嘢，咁可以选择多功能早餐机，一次过满足你嘅百变要求！蒸烤二合一嘅早餐机，烤盘可以做西式香口烤物，蒸盘就可以蒸煮中式食物，一个人一双手，同时搞掂两款美食真系易过借火。机器嘅温度仲可以根据唔同嘅食材调整，真係够晒贴心。如果觉得蒸烤双头都唔够多花臣嘅话，试下烤箱式多功能料理机啦——烤箱上方配备两个小炉头，可煮可煎，一面焗点心，一边煮粥，仲可以加个煎蛋添。除咗烤箱之外，有啲早餐机仲安排埋煮咖啡装置，热奶、煲茶都适用，“小熊”全自动早餐机将热饮台设计成可折叠，唔用嘅时候可以隐藏，颜值高仲方便收纳。

 　　小熊 咖啡早餐机

 　小熊 咖啡早餐机

 　　万厨 烤箱配蒸煮功能

　　

　　粉面仪式感

　　广东人对食好执着，有啲地道嘅美食，时不时都要食下先安乐！肠粉係“广东胃”最爱嘅美食之一，如今可以用肠粉机自己整，早餐、宵夜随便安排，几时想食可以几时整。同普通嘅蒸锅最大嘅唔同，肠粉机采用抽屉式蒸格，配埋专业刮片俾你刮肠粉，令传统美味的出场充满仪式感。正所谓“南粉北面”，北方的小伙伴如果想食面，面条枪就可以帮到你。搓好面团之后放入“弹仓”，轻松扣动扳机就能“射”出面条，只要切换枪头，粗面、幼面、刀削面任君选择，准备好唔同嘅汤底或者料头，咩风味嘅面食都可以手到拿来。

 　　小熊 制面枪

 

 　美的 肠粉机