超萌汪汪队 治愈力MAX！

　　城市发展速度越来越快，我哋嘅生活节奏亦都在不经不觉间加快，忙碌嘅人们总想在须臾间找寻治愈良药。饮一杯靓靓嘅饮品，吃一餐美味的大餐，又或者係“RUA”一把毛茸茸嘅猫猫狗狗，都可以有效地帮大家释放压力。今日Color君要同大家介绍嘅两间狗狗主题店，各有特色，治愈力MAX！　　

　　黄芷晴/文 秦丽莹/图 黄蕾/模特

　　

　　柴犬带你住别墅

 

　　沉浸式撸狗

　　位于北京路附近嘅“柴圆滚滚”，係一间独立小别墅，一共有五层，分区包揽晒你撸狗时嘅吃喝玩乐。一楼餐饮区做咗挑高，被设计成往“柴圆村”方向的“火车站”，入门左边係可以打卡嘅“候车区”，右边係“餐车”，壁画同其他小细节都可以感受到设计者嘅用心。至于餐品上嘅设计，主理人嘅谂法好简单：“既然做得柴犬咖啡店，一于就柴犬到底。”柴犬piapia汉堡、柴犬刨冰、柴犬汤圆丸子……卖相可爱精致，根本唔知点样落手，食落味道又可圈可点，令人食到停唔到口。作为“老员工”狗狗都好积极营业，店员一个手势，就会排排坐好，等住同顾客合照。

 

 

 

　　全员“广州仔女”？

　　近几年一讲到狗狗，好多人脑内就浮现出柴犬英俊可爱嘅脸庞，加上佢哋有趣的个性，迅速霸占最受欢迎狗狗排行榜的榜首。“柴圆滚滚”嘅主理人，就系凭借这份热爱，开咗呢间柴犬主题咖啡店，希望可以帮到那些真心中意柴犬，但又冇能力条件养的朋友，一圆佢哋嘅“撸狗梦”。细细个嘅时候，因为爸爸妈妈唔俾养狗，等到自己有经济能力，主理人就开始“报复性”养狗，越养越多。店内嘅柴犬成员嘅名好盏鬼嘎，佢哋分别叫“砂煲”“罂罉”“柴”“米”“油”“盐”……呢啲咁有老广特色嘅名字，一听就知道主理人係“广州土著”，全部狗仔叫出嚟，你会以为我哋准备玩煮饭仔。

 

 

 

　　柴圆滚滚咖啡店·刨冰·萌宠·柴咖

　　地址：越秀区中山六路惠吉东28号

　　营业时间：13:00-20:00

　　

　　哈士奇唔係百厌星　

 

　　原来係一家人

　　被誉为“拆迁队队长”嘅哈士奇，虽然“拆家能力”令人闻风丧胆，不过佢哋有趣嘅性格依然俘虏咗好多人嘅芳心。位于番禺区嘅“星多哈”，係一间主推哈士奇嘅撸狗体验店。故事由老板领养嘅两只哈士奇开始，“毛毛”同“鱼蛋”坠入爱河，并且繁衍出五只精灵般嘅后代，后来老板又收养咗一只萨摩耶小白，组成咗一支训练有素嘅“汪汪队”。老板只只都唔舍得送人，于是就全部亲手养大。但中大型犬胃口大、花销大，所以佢就决定让狗狗“自食其力”，于是“星多哈”呢间哈士奇主题体验店就诞生啦。

 

 

 

　　“汪汪队”有私窦

　　老板喺自己地头，开辟咗一个开阔嘅空间供8只狗狗活动。客人嚟到可以直接去一楼同狗狗亲密接触，又可以去到二楼的玻璃屋，向下俯看狗狗嘅一举一动。二楼玻璃屋布置都充满哈士奇元素，有好多可爱嘅哈士奇公仔，照片墙记录咗“汪汪队”嘅成长点滴，仲有好多老板同狗狗们嘅合照。撸狗套餐仲会提供简单餐饮，闲来无事，同朋友仔过来打卡，叹番杯柠檬茶，都唔错噶。作为珠三角少有嘅哈士奇专门体验店，好多外市嘅朋友都会慕名而来。店内狗狗嘅性格都好好，唔会乱叫，热情好客，嚟到一定能颠覆你对哈士奇百厌顽皮的传统印象。